Arsenali shton presionin për Bruno Guimaraes, mesfushori i Newcastle kërkon largimin

Bruno Guimaraes i ka komunikuar Newcastle se synon të largohet nga “St James’ Park” këtë verë, ndërsa Arsenali ka rritur ndjeshëm përpjekjet për ta afruar në skuadër.

Klubi londinez është në kërkim të përforcimeve në repartin e mesfushës dhe e sheh reprezentuesin brazilian si objektivin kryesor për të krijuar një dyshe me Declan Rice në qendër të fushës.

Sipas BBC Sport, në një zhvillim që përbën goditje të fortë për planet e Eddie Howe, mesfushori ka paraqitur zyrtarisht kërkesën për t’u larguar nga Newcastle.

Futbollisti 28-vjeçar, që ka kontratë deri në verën e vitit 2028, ka qenë një nga figurat kyçe të mesfushës së Newcastle që prej kalimit të tij nga Lyoni në vitin 2022. Sidoqoftë, besohet se ai tashmë po kërkon një hap të ri në karrierë, te një skuadër që merr pjesë në Ligën e Kampionëve.

Ky lajm vjen në një periudhë të ndërlikuar për klubin anglez, i cili në këtë afat kalimtar ka humbur tashmë disa futbollistë të rëndësishëm.

Newcastle nuk është i gatshëm të pranojë largimin e kapitenit të ekipit, sidomos pas daljeve të bujshme të Sandro Tonali dhe Anthony Gordon.

Gjithsesi, përfaqësuesit e lojtarit kanë nisur tashmë diskutime për të ardhmen e tij, ndërsa një shumë fillestare prej rreth 70 milionë eurosh është përmendur si bazë e mundshme për negociatat.

Edhe pse Newcastle pritet të luftojë për të mbajtur një nga lojtarët më të rëndësishëm të skuadrës, trysnia nga Londra po rritet vazhdimisht.

Mikel Arteta mbetet i vendosur të sjellë më shumë cilësi elitare në mesfushën e Arsenalit dhe klubi pritet të paraqesë një ofertë të re për brazilianin.

Më herët, Arsenali kishte analizuar mundësinë për transferimin e Sandro Tonalit, përpara se ai të kalonte te Tottenhami, por tani vëmendja e tij është përqendruar plotësisht te Bruno Guimaraes.