Arsenali rinis kontaktet me Atletico Madridin për Alvarezin, por Barcelona mbetet destinacioni i ëndërruar i sulmuesit

Drejtuesit e Arsenalit kanë rivendosur linjat e komunikimit me Atletico Madridin për një kalim të mundshëm të Julian Alvareit në Londër, edhe pse planet e klubit anglez varen në masë të madhe nga dëshira e argjentinasit për t’u transferuar fillimisht te Barcelona.

Mikel Arteta e vlerëson jashtëzakonisht lojtarin e kombëtares argjentinase, duke e konsideruar atë si një goditje të rëndësishme në merkato që do t’i shtonte thellësi dhe cilësi armatimit ofensiv të skuadrës së tij.

Fakti që ish-bomberi i Manchester Cityt mund të mbulojë disa role në fazën e sulmit, qoftë si qendërsulmues i vetëm, në duo me një tjetër lojtar ose i pozicionuar në korridoret anësore, e bën atë një objektiv ideal për profilin që kërkon tekniku spanjoll.

Informacionet nga platforma Hand of Arsenal flasin për bisedime të drejtpërdrejta ndërmjet niveleve të larta të Arsenalit dhe Atletico Madridit, megjithëse palët mbeten ende larg njëra-tjetrës në aspektin e vlerësimit ekonomik të kartonit dhe asnjë akord nuk është arritur deri më tani.

Megjithatë, vetë ekzistenca e këtyre kontakteve sinjalizon angazhimin e vërtetë të klubit londinez për të analizuar me kujdes kushtet e një operacioni eventual, në rast se do të hapej mundësia për të siguruar shërbimet e argjentinasit.

Dëshira personale e Alvarezit pritet të peshojë shumë në këtë situatë, duke marrë rolin e faktorit vendimtar në vendimin përfundimtar.

Raporte të ndryshme mediatike sugjerojnë se futbollisti 26-vjeçar do ta shihte me sy të mirë një aventurë te Arsenali vetëm nëse dështon përpjekja për t’u bashkuar me Barcelonën, që mbetet opsioni i tij prioritar.

Aktualisht, Atletico Madridi nuk ka asnjë qëllim për ta shitur Alvarez te klubi katalanas dhe mendohet se do t’i rezistojë me vendosmëri çdo oferte nga Camp Nou.

Ndërkohë që Barcelona mund të provojë sërish të hyjë në garë pas përfundimit të Kupës së Botës, përfundimi i kësaj iniciative pritet të jetë përcaktues për të kuptuar nëse Arsenali do të ketë rrugën e hapur për të avancuar për yllin argjentinas.