Anglia dhe Norvegjia pa fitues në kohën e rregullt, çerekfinalja vendoset në vazhdime

Çerekfinalja ndërmjet Anglisë dhe Norvegjisë nuk nxori fitues pas 90 minutave, pasi koha e rregullt u mbyll me rezultatin 1-1 dhe ndeshja kaloi në vazhdime.

Norvegjezët u shfaqën më kërkues në nisje të takimit dhe arritën të konkretizonin epërsinë në minutën e 36-të.

Andreas Schjelderup shënoi me një goditje të bukur nga brenda zonës, ndërsa topi preku shtyllën përpara se të ndalej në rrjetë për 1-0. Fillimisht, episodi u verifikua nga VAR-i për një faull të mundshëm ndaj Harry Kane në ndërtimin e aksionit, por goli më pas u quajt i rregullt.

Reagimi i Anglisë erdhi në fund të pjesës së parë. Në minutën e 45+2, Anthony Gordon shërbeu saktë për Jude Bellingham, i cili finalizoi bukur duke e çuar topin në këndin e poshtëm të portës për 1-1.

Menjëherë më pas, Harry Kane besoi se kishte kaluar ekipin e tij në avantazh, por tentativa e tij u anulua për pozitë jashtë loje.

Në fraksionin e dytë, Thomas Tuchel aktivizoi Bukayo Sakan dhe Eberechi Ezen për t’i dhënë më shumë shpejtësi repartit ofensiv të anglezëve, por loja mori drejtim tjetër, pasi Norvegjia u tregua më kërcënuese.

Madje, në minutën e 55-të, skandinavët menduan se rimorën epërsinë kur Torbjorn Lysaker Heggem shënoi pas një topi të kthyer nga Jordan Pickford. Sidoqoftë, pas sinjalizimit të VAR-it, goli nuk u pranua për shkak të një faulli të Erling Haaland para harkimit të topit.

Norvegjia vijoi të krijonte rrezik dhe në minutën e 76-të iu afrua shumë golit, kur David Wolfe goditi traversën me kokë pas një krosimi të saktë.

Në fundin e ndeshjes pati lëvizje nga pankinat dhe tentativa për ta zgjidhur sfidën brenda kohës së rregullt, por asnjëra prej skuadrave nuk gjeti dot golin vendimtar.

Kështu, pas 90 minutave, rezultati mbeti 1-1 dhe fituesi i kësaj çerekfinaleje do të përcaktohet në vazhdime.