Albian Ajeti rilind te Lugano: gjashtë gola në dhjetë ndeshje pas një periudhe të vështirë

Albian Ajeti po kalon një nga momentet më të mira të karrierës së tij te FC Lugano, ku ka rikthyer formën dhe nuhatjen e golit pas vështirësive që përjetoi te Baseli.

Sulmuesi shqiptar ka gjetur rrjetën gjashtë herë në dhjetë paraqitje me ekipin e ri, duke kontribuar mesatarisht në një gol çdo 60 minuta. Ky është një përmirësim i madh për 29-vjeçarin, pasi nga janari deri në fund të gushtit kishte shënuar vetëm një gol me Baselin.

Një rol të rëndësishëm në rikthimin e tij ka pasur trajneri i Luganos, Mattia Croci-Torti, i cili i ka dhënë sërish besim sulmuesit në një moment të vështirë të karrierës.

Thomas Haberli, ish-trajneri i Ajetit te skuadra U21 e Baselit, ka folur për arsyet që mund të kenë ndikuar në luhatjet e tij dhe për mënyrën se si ai funksionon si futbollist.

Sipas Haberli, Ajeti ka nevojë për besim dhe për një raport të afërt me trajnerin. Ai e përshkruan sulmuesin si një person shumë të lidhur me familjen, ndërsa vlerësimin për paraqitjet e tij e lidh kryesisht me numrin e golave të shënuar.

Gjatë periudhës kur drejtohej nga Haberli, Ajeti realizoi 23 gola, shifër kjo më e lartë se ajo që ka regjistruar me çdo trajner tjetër në karrierën e tij.

Haberli tregon se Ajeti iu bashkua ekipit kur ishte vetëm 16 vjeç dhe se që në atë kohë synonte të fitonte një vend në ekipin e parë.

Pas titullit kampion me Baselin, sulmuesi u përball me kritika të vazhdueshme për paraqitjet e tij si pika kryesore e repartit ofensiv. Në të njëjtën kohë, raporti i tij me trajnerin Stephan Lichtsteiner u përkeqësua, duke e bërë të nevojshme kërkimin e një klubi të ri.

Haberli mendon se Ajeti i ka ruajtur cilësitë e tij dhe se aventura në Lugano mund t’i japë mundësinë të rikthehet në nivelin e shfaqur në fillimet e karrierës.

Ish-trajneri i tij nuk e përjashton as mundësinë që shqiptari të mbyllë sezonin si golashënuesi më i mirë i kampionatit zviceran.

Për të ilustruar këtë mundësi, Haberli sjell si shembull Haris Tabakovicin, i cili pati shpërthimin e tij në moshën 28-vjeçare.

Megjithëse në të kaluarën u transferua nga Baseli te West Hami për rreth 12 milionë franga zvicerane, Ajeti kaloi më pas edhe te Celtic dhe Augsburg, pa arritur të ndërtonte vazhdimësi në nivelet më të larta.

Te Lugano, megjithatë, ai duket se ka gjetur kushtet e përshtatshme për të rikthyer veten në qendër të vëmendjes.

“Besoj se ardhja te Lugano ishte vendimi i duhur për të”, është shprehur Haberli.

Vëmendja tani do të jetë te përballja e ardhshme me Baselin, ish-klubin e tij, ku Ajeti mund të startojë dhe të përballet nga minuta e parë me skuadrën që nuk arriti të nxirrte në pah potencialin e tij.