Al-Taawoun dënohet pas thirrjeve fyese të tifozëve ndaj Ruben Nevesit për Diogo Jotën

Shoqata e Futbollit të Arabisë Saudite ka marrë masa disiplinore ndaj Al-Taawoun pas sjelljes së një grupi tifozësh gjatë përballjes së kampionatit me Al-Hilalin.

Skuadra vendase u mund me rezultatin 6-0, ndërsa nga tribunat u dëgjuan vazhdimisht thirrjet “Jota, Jota, Jota” drejtuar mesfushorit portugez Ruben Neves. Tifozët iu referuan kështu mikut të tij të ndjerë dhe ish-bashkëlojtarit, Diogo Jota, i cili humbi jetën në një aksident automobilistik në Spanjë në korrik të vitit 2025.

Reagimi i Nevesit tregoi qartë se thirrjet e prekën. Futbollisti bëri një gjest duke treguar fillimisht syrin dhe më pas qiellin, ndërsa pas përfundimit të ndeshjes tha: “Shpresoj të mos shkojë të lutet pas kësaj”.

Ruben Neves dhe Diogo Jota kishin krijuar një marrëdhënie të ngushtë gjatë periudhës kur luajtën së bashku te Wolverhampton dhe me Kombëtaren e Portugalisë. Nevesi ishte edhe një prej personave që mbajtën arkivolin në ceremoninë mortore të Jotës.

Cristiano Ronaldo kërkoi që incidenti të mos mbetej pa pasoja dhe bëri thirrje për një ndëshkim të rreptë ndaj tifozëve.

“Liga duhet të reagojë dhe ta ndëshkojë këtë lloj sjelljeje. Ky nuk është më futboll dhe duhet të ketë kufij. Njerëzit që sillen kështu nuk duhet të hyjnë më kurrë në stadium”, shkroi Ronaldo.

Pas ngjarjes, Al-Hilal dorëzoi një ankesë zyrtare. Nga ana tjetër, Al-Taawoun e dënoi sjelljen e tifozëve të përfshirë dhe u distancua publikisht nga ajo.

Komisioni Disiplinor dhe i Etikës ka vendosur që Al-Taawoun t’i luajë dy ndeshjet e ardhshme si pritës në kampionat pa tifozë. Përveç kësaj, klubi është ndëshkuar edhe me një gjobë financiare.