U godit me sende të forta në kokë, policia: Arma e shërbimit është shkrepur në mënyrë të të pavullnetshme

Gjatë një konflikti të çastit, për motive të dobëta, shtetasi Ormir Gucia ka dëmtuar në kokë, me sende të forta efektivin e policisë në Shkodër, Admir Okaj i cili ndodhej jashtë shërbimit.

Bëhet me dije se efektivi është konfliktuar me fqinjin e tij, shkak dyshohet se ka qenë një konflikt i çastit.

Efektiv Oka, pasi ka marrë mjekim në spital, ka shkuar në komisariat për të dhënë dëshminë e tij në lidhje me ngjarjen.

Njoftimi i policisë:

Shkodër/Informacion paraprak

Rreth orës 15:45, dyshohet se gjatë një konflikti të çastit, për motive të dobëta, shtetasi O. G., 47 vjeç, ka dëmtuar në kokë, me sende të forta, shtetasin A. O., 49 vjeç, banues në Shkodër (punonjës policie, jashtë shërbimit), i cili po merr mjekim në spitalin rajonal të Shkodrës dhe është jashtë rrezikut për jetën.

Gjatë konfliktit dyshohet se arma e shërbimit e punonjësit të Policisë është shkrepur në mënyrë të pavullnetshme, por pa shkaktuar dëmtime.

Shërbimet e Policisë, me marrjen e njoftimit, shkuan menjëherë në vendin e ngjarjes dhe vijojnë krehjen e zonës, për kapjen e 47-vjeçarit.

Grupi hetimor, në drejtimin e Prokurorisë, vijon punën për sqarimin e plotë të rrethanave të ngjarjes.

Ndërkohë, në lidhje me këtë ngjarje, po kryen veprime edhe AMP, për të zbardhur rrethanat e përdorimit ose jo të armës së zjarrit, si dhe për të përcaktuar nëse shkrepja e armës ka qenë e pavullnetshme.