“Burgosi” gruan dhe fëmijët dhe i monitoronte me kamera, Jetnor Zhaboli shtrohet në spital psikiatrik

Gjykata e Tiranës ndryshon masën e sigurisë nga arrest në burg me shtrim të përkohshëm në spital psikiatrik për Jetnor Zhabolin.

Vendimi erdhi pas paraqitjes së ekspertizës mjekësore e cila e përcaktoi se ka qenë i papërgjegjshëm në kohën e kryerjes së veprimeve.

Ai arrestua pas denoncimit fqinjët për heqje të paligjshme të lirisë, teksa kishte instaluar në banesë kamera vëzhgimi me të cilat kontrollonte anëtarët e familjes.

Ngjarja u zbulua në rrugë operative nga banorë të pallatit, ndërsa nga bashkëshortja e tij nuk kishte asnjë denoncim në polici.

Zhaboli, jo vetëm i mbante të mbyllur gruan dhe fëmijët, por edhe i dhunonte ata dhe i monitoronte me kamera në çdo cep të shtëpisë, përfshirë këtu edhe tualetin. Ndërsa në korridor, ai kishte vendosur bllokues valësh telefoni, çka e bënte të pa mundur që pjesëtarët e shtëpisë të përdornin telefon.

Dhuna e 35-vjeçarit ishte bërë aq e egër, sa bashkëshortja e tij nuk ka mundur ta përballojë. Ajo kishte tentuar disa herë vetëvrasjen, e madje kishte lënë edhe letra lamtumire për familjarët, ku u kërkonte atyre falje./albeu.com