“Bandat kanë ndryshuar taktikë”, Ervin Karamuço zbulon se si do të sillen të “fortët” në këto zgjedhje

Fushatat zgjedhore në Shqipëri historikisht kanë qenë shumë të “nxeha” ku ka patur përplasje mes militantëve, por edhe të fortëve që qendrojnë mbas forcave politike.

Kujtojmë që në 21 prill të vitit 2021 u vra me armë zjarri në qytetin e Elbasanit Pjerin Xhuvani dhe u plagosën katër të tjerë, nga një anëtar i mbrojtjes së votës i Partisë Demokratike, pas një debati të ashpër në qendër të qytetit.

Ndërkohë që pak ditë më parë iu vu tritol makinës së kreut të PD të Vaut të Dejës, Bernard Ndreca, ngjarje e cila u komentua se kishte prapavijë politike.

Duke folur për situatat e pazakonta gjatë fushatave zgjedhore, eksperti i kriminalistikës dhe sigurisë, Ervin Karamuço, duke folur në “Zonë e Lirë”, deklaroi se në këto zgjedhje qarku i Elbasanit do të jetë një nga më të qetët.

Sipas tij bandat kanë ndryshuar taktikë, ku një pjesë është larguar nga vendi, ndërsa të tjerët shtoi ai kanë zgjedhur heshtjen.

“Të gjitha bandat kanë ndryshuar taktikë. Disa prej tyre, ata problematikë që janë në kërkim, janë larguar, janë në disa shtete të tjera. Ata që janë, rrinë në heshtje, rrinë pa zhurmë. Elbasani do jetë një nga zonat më të qeta në Shqipëri. Zonat e tjera, që janë parashikuar si më të nxehta, nuk rezulton se është Elbasani”, tha Karamuço.