Video/ “Verë dhe Portokalle” ndez Kavajën, humor e muzikë në shëtitoren e qytetit

Shëtitorja e re e Kavajës u shndërrua në një skenë të hapur spektakli, pasi qytetarë dhe pushues të shumtë u mblodhën për të ndjekur “Verë dhe Portokalle”.

Mbrëmjes iu bashkuan familje me fëmijë, të rinj dhe të moshuar nga Kavaja, por edhe nga zonat përreth. Aktorët e “Portokallisë” interpretuan personazhet e tyre më të dashura, duke sjellë përmes humorit, batutave dhe ironisë situata e fenomene të njohura të përditshmërisë shqiptare.

Publiku e shoqëroi çdo dalje në skenë me të qeshura dhe duartrokitje, duke krijuar një atmosferë të gjallë përgjatë gjithë mbrëmjes. Për aktorët, ndalesa në Kavajë konfirmoi edhe një herë se humori mbetet i dashur për një audiencë të gjerë, pa dallim moshe.

Spektakli “Verë dhe Portokalle” vijon turin veror në qytete të ndryshme të vendit, duke sjellë në skenat e hapura personazhet e njohura të ekranit dhe atmosferën e humorit.

Pas Kavajës, turneu do të ndalet në Kamëz, ku publiku do të ketë mundësinë të shijojë sërish një mbrëmje me humor, muzikë dhe argëtim pafund në shesh.