Victoria Beckham refuzon pensionin: “Nuk kam ndërmend të ndalem së punuari”

Victoria Beckham ka deklaruar se nuk ka plane për pensionim, duke theksuar se puna dhe angazhimi profesional janë një pjesë thelbësore e jetës së saj.

Në një intervistë për gazetën britanike The Times, publikuar më 27 maj, ajo u shpreh se e ndien veten më të plotësuar kur është e zënë me punë dhe projekte të reja.

“Thjesht e dua atë që bëj. I dua njerëzit me të cilët punoj. Pra, për momentin, jo. Për të qenë e sinqertë, do të mërzitesha shumë. Më pëlqen të jem e zënë,” tha Beckham, duke shtuar se dëshiron që fëmijët e saj të rriten duke parë pasionin dhe etikën e punës.

Jo Angelina, as Jennifer, Brad Pitt zbulon kush ishte gruaja më e bukur për të!
Ajo theksoi gjithashtu se shembulli që japin ajo dhe bashkëshorti i saj, David Beckham, është i rëndësishëm për katër fëmijët e tyre. “Ata shohin etikën e punës si te unë ashtu edhe te David. Mendoj se është mirë që fëmijët ta shohin këtë,” u shpreh ajo.

Victoria Beckham u bë e famshme në vitet ’90 si anëtare e grupit të suksesshëm Spice Girls, përpara se të ndiqte një karrierë solo në muzikë dhe më pas të hynte në botën e modës me markën e saj.

Në dokumentarin e saj të fundit për Netflix, të publikuar në vitin 2025, ajo ka folur hapur edhe për vështirësitë e biznesit të saj të modës, duke treguar se marka ka qenë pranë kolapsit financiar.

“Pothuajse humba gjithçka, dhe ajo ishte një periudhë shumë e errët. Qaja çdo ditë para se të shkoja në punë,” rrëfeu ajo, duke shtuar se kompania ishte në humbje të mëdha dhe nën presion të vazhdueshëm.

Ajo tregoi se situata filloi të ndryshonte pas hyrjes së një partneri të ri biznesi, i cili kërkoi ristrukturim të plotë të kompanisë. Beckham pranoi se kishte bërë gabime dhe se kishte humbur drejtimin në një periudhë të vështirë të karrierës së saj.

Sot, ajo thotë se është më e fokusuar se kurrë në punën dhe zhvillimin e markës së saj, duke mos parë pensionin si një opsion në të ardhmen e afërt.