Vdekja e Presley Gerber, djalit të Cindy Crawford: Çfarë ofronte qendra e rehabilitimit 7.7 milionë dollarë ku ai qëndronte

Presley Gerber, 27-vjeçari bir i modeles së njohur Cindy Crawford dhe sipërmarrësit Rande Gerber, humbi jetën të dielën, më 20 shtator, në një qendër rehabilitimi në Santa Monica të Kalifornisë. Lajmi ka shokuar familjen e tij dhe ka hedhur dritë mbi institucionin ku ai kërkoi ndihmë për problemet që e mundonin.

Sipas informacioneve paraprake të policisë, Gerber dyshohet se pësoi një atak kardiak si pasojë e një mbidoze të substancave të ndaluara, ndërkohë që rrethanat e vdekjes kanë ngritur edhe pyetje për kushtet në klinikë.

Bëhet fjalë për Resolutions Living, një strukturë trekatëshe me vlerë rreth 7.7 milionë dollarë, e specializuar në trajtimin e personave që vuajnë nga varësitë dhe çrregullimet e shëndetit mendor, sipas një shkrimi të publikuar nga Page Six.

Në faqen e saj zyrtare, klinika premton t’u sigurojë pacientëve një ambient të qetë dhe të sigurt. Programet e saj terapeutike janë të strukturuara në tri etapa dhe përshtaten individualisht, duke përfshirë vendosjen e objektivave, angazhimin në punë vullnetare dhe ushtrime për forcimin e karakterit, të gjitha nën drejtimin e një ekipi të specializuar.

Ekipi multidisiplinar përbëhet nga këshilltarë të certifikuar, mjekë, psikiatër, psikologë, terapistë të fushave të ndryshme, instruktorë joge, si dhe një akupunkturist dhe hipnoterapist.

Përveç dhomave të qëndrimit, kompleksi përmban një sallë kinemaje, një palestër dhe një kuzhinë të pajisur plotësisht, ku një shef kuzhine gatuan ushqime për pacientët.

Pronari i Resolutions Living ende nuk ka dhënë asnjë deklaratë zyrtare lidhur me këtë ngjarje tragjike.

Një burim pranë familjes Gerber i tha Page Six se 27-vjeçari kishte kohë që përballej me sfida të rënda dhe ishte i vetëdijshëm për nevojën e ndihmës profesionale, duke dëshiruar t’u shpëtonte varësive. Sipas të njëjtit burim, Presley vuante gjithashtu nga mungesa e vetëbesimit dhe e kishte të vështirë të pranonte veten, shpesh i pasigurt për identitetin e tij.

Ai kishte ndarë hapur me të tjerët vështirësitë e tij, ndërsa familja e kishte mbështetur pa rezerva në çdo përpjekje për t’i tejkaluar ato.

Vendosja në Resolutions Living ishte tentativa e tij e fundit për të marrë trajtim të specializuar. Megjithatë, ekspertët tërheqin vëmendjen se të qenit në një program rehabilitimi nuk e bën një individ të imunizuar ndaj rreziqeve mjekësore të lidhura me varësinë dhe përdorimin e substancave.