Sulltani i Bruneit përjashton nusen e djalit nga familja mbretërore dhe i heq të gjithë titujt

Pengiran Rabiatul Antawiyya nuk është më pjesë e familjes mbretërore të Bruneit dhe ka humbur të gjithë titujt e saj, pas një vendimi të marrë nga sulltani Hassanal Bolkiah.

Masa ndaj 33-vjeçares lidhet me atë që pallati e ka përshkruar si “sjellje të papërshtatshme”. Ajo dyshohet se ka “njollosur emrin e mirë të monarkisë” dhe ka shfaqur “mungesë respekti” kundrejt sulltanit.

Nuk është sqaruar nga pallati se cili veprim konkret i Rabiatul Antawiyya-s ka zemëruar Hassanal Bolkiahun. Zyra e Kamerierit të Madh ka konfirmuar vetëm se ajo nuk njihet më si anëtare e familjes mbretërore dhe se i janë revokuar të gjithë titujt.

Rabiatul Antawiyya u bë pjesë e familjes mbretërore në vitin 2015, pas martesës me Princin Abdul Malik. Ai është djali i dytë i sulltanit nga martesa e parë me Mbretëreshën Saleha.

Ceremonia madhështore e martesës së tyre u zhvillua përgjatë dhjetë ditëve. Çifti ka katër vajza dhe, sipas raportimeve, vendimi i sulltanit nuk ka ndikuar te titujt mbretërorë të fëmijëve.

Hassanal Bolkiah konsiderohet një prej monarkëve më të fuqishëm në botë. Ai e mban fronin që prej vitit 1967, duke u renditur mes monarkëve me periudhën më të gjatë të sundimit.

Që nga viti 1984, kur Brunei fitoi pavarësinë nga Britania, ai ushtron edhe detyrën e kryeministrit. Krahas pushtetit të gjerë politik, sulltani drejton ministritë e Mbrojtjes, Punëve të Jashtme dhe Financave, si dhe mban nën kontroll të fortë institucionet e sigurisë dhe politikën fetare të vendit.

Organizatat ndërkombëtare e kanë kritikuar prej vitesh sundimin e tij për problematikat që lidhen me të drejtat e njeriut. Brunei filloi në vitin 2014 zbatimin e një sistemi të ashpër të ligjit penal islamik, i cili përcaktonte ndëshkime të rënda për disa vepra.

Reagime të forta në arenën ndërkombëtare u shkaktuan në vitin 2019, kur hynë në fuqi dispozitat që parashikonin dënimin me vdekje përmes gurëzimit në disa raste të marrëdhënieve homoseksuale dhe tradhtisë bashkëshortore. Më vonë, qeveria deklaroi se moratoriumi ekzistues ndaj ekzekutimeve do të përfshinte edhe këto dispozita.

Megjithëse është përballur me kritika, Hassanal Bolkiah ka vazhduar të ketë raporte të afërta me familjen mbretërore britanike. Marrëdhënia ishte veçanërisht e ngushtë me Mbretëreshën Elizabeth II, të cilën e kishte takuar disa herë ndër vite.