Shuhet në moshën 78-vjeçare Sam Neill, aktori që magjepsi publikun në “Jurassic Park” dhe “The Piano”

Ka ndërruar jetë në moshën 78-vjeçare aktori i njohur neozelandez Sam Neill.

Njoftimi për vdekjen e tij u dha nga familja, përmes një postimi në llogarinë zyrtare të aktorit në Instagram.

Familja nuk bëri të ditur shkakun e saktë të vdekjes, por kujtojmë se Neill ishte diagnostikuar në vitin 2022 me limfomë angioimunoblastike të qelizave T në fazën e tretë, një formë e rrallë e kancerit të gjakut, të cilën ai e kishte mposhtur më vonë.

Aktori u nda nga jeta në Sydney të Australisë, i rrethuar nga njerëzit e tij më të dashur, siç bëri të ditur familja.

“Me trishtim të thellë familja e Sam Neill njofton vdekjen e tij. Sam ishte i rrethuar nga familja dhe u largua nga kjo jetë me dinjitetin që e karakterizoi gjithmonë. Humbja ishte e papritur, por jemi të bekuar që ai mbeti pa kancer. Falënderojmë stafin e Spitalit Privat të Shën Vincentit për kujdesin e jashtëzakonshëm dhe kërkojmë që të respektohet privatësia jonë në këtë moment të vështirë”, thuhet në deklaratën e publikuar.

Kryeministri australian Anthony Albanese reagoi pas lajmit, duke i kushtuar një homazh artistit. Ai theksoi ndikimin e Neill në kinematë australiane dhe botërore.

“Sam Neill luajti në kaq shumë histori të dashura australiane dhe fitoi një vend të veçantë në zemrat e australianëve. Ai luftoi sëmundjen me dinjitet, humor dhe forcë. Do të na mungojë shumë dhe do të kujtohet gjithmonë. U prehtë në paqe”, shkroi Albanese.

I lindur në Omagh të Irlandës së Veriut në vitin 1947, Neill u rrit në Zelandën e Re. Ai arriti famë globale me rolin e Dr. Alan Grant në filmin “Jurassic Park” të Steven Spielberg. Gjatë karrierës së tij, interpretoi edhe në prodhime të tjera të suksesshme si “The Piano”, “The Hunt for Red October”, “The Tudors”, “Peaky Blinders”, “Event Horizon” dhe “The Hunt for the Wilderpeople”, ndër shumë të tjera.

Në një rrugëtim artistik që kapërceu pesë dekada, Neill mori pjesë në më shumë se 150 filma dhe seriale televizive, duke u bërë një figurë ikonike e kinemasë ndërkombëtare. Si shenjë nderimi për kontributin e tij në art, atij iu dha titulli “Sir” në Zelandën e Re.

Aktori lë pas katër fëmijë dhe gjashtë nipër e mbesa.