Sean Penn mbetet njeriu më i dashur për Madonna-n, dueti i ri e pajton me Lourdes

Ndonëse në projektin e saj më të fundit muzikor Madonna i kushton vërejtje kritike ish-bashkëshortit Sean Penn, një person i afërt me këngëtaren thotë se aktori fitues i Oscar-it vazhdon të jetë dashuria më e madhe e jetës së saj.

Sipas Page Six, albumi “Confessions on a Dance Floor Part II” përfshin këngë me referenca për vëllain e ndjerë të artistes, njerkën e saj dhe Sean Penn, me të cilin Madonna pati një martesë të trazuar gjatë viteve ’80. Në një nga këngët, ajo përmend “ndjesinë e kërcënimit” që kishte përjetuar në atë marrëdhënie.

Megjithatë, miku i afërt i “Mbretëreshës së Popit” ka deklaruar se Penn, pavarësisht gjithçkaje të përmendur në album, nuk ka reshtur së qeni personi që Madonna ka dashur më shumë.

Albumi përmban gjithashtu një pjesë tepër intime për këngëtaren: një duet me vajzën e saj 29-vjeçare, Lourdes Leon. Sipas Madonnës, ishte Lourdes ajo që i sugjeroi të krijonin një këngë bashkë, me synimin për të riparuar raportin mes tyre.

Burime pranë artistes kanë bërë të ditur se marrëdhënia mes nënës dhe vajzës ka njohur momente të ndërlikuara. Lourdes mendonte se Madonna kishte treguar shumë rreptësi gjatë edukimit të saj, ndërsa këngëtarja ndiente faj për faktin se e rriti të bijën në mes të famës globale dhe vëmendjes së pandërprerë publike.

Në këngën e realizuar së bashku, Madonna e quan Lourdes “yll i vogël”, një nofkë që e kishte përdorur për të edhe në albumin “Ray of Light” të vitit 1998, kur vajza ishte vetëm dy vjeçe.

Sipas mikut të saj, ftohja mes tyre lidhej edhe me dëshirën e Lourdes për të krijuar identitetin e vet, pa u etiketuar thjesht si vajza e një superylli.

Prej vitesh, Madonna është kritikuar për stilin e saj të rreptë në rritjen e gjashtë fëmijëve. Raportimet tregojnë se ajo kishte vendosur rregulla të forta në shtëpi, duke kufizuar teknologjinë dhe duke ndjekur një mënyrë jetese të disiplinuar.

Edhe Lourdes ka pohuar më parë se e ëma ishte “një maniake e kontrollit”. Ajo ka treguar se, pas mbarimit të shkollës së mesme, ndjeu nevojën të jetonte në mënyrë të pavarur për të ndërtuar rrugën e saj në jetë.

Megjithatë, marrëdhënia e tyre duket se ka ndryshuar dukshëm për mirë. Sipas burimeve pranë familjes, puna e përbashkët në muzikë i ka ndihmuar nënë e bijë të kapërcejnë mosmarrëveshjet dhe të afrohen përsëri.

“Madonna dhe Lola kanë pasur vështirësi në marrëdhënien e tyre, por tani po shkojnë shumë mirë falë krijimit të kësaj kënge”, u shpreh miku i artistes për Page Six.