Sean Penn, dashuria e përjetshme e Madonnës; albumi i ri e afron këngëtaren me të bijën, Lourdes

Pavarësisht toneve të ashpra që Madonna përdor ndaj ish-bashkëshortit Sean Penn në projektin e saj më të fundit muzikor, një person i afërt me artisten ka treguar se fituesi i çmimit Oscar mbetet pasioni më i zjarrtë i jetës së saj.

Sipas raportimeve nga Page Six, në disa pjesë të albumit “Confessions on a Dance Floor Part II” ka aludime për të vëllanë e saj të ndjerë, njerkën, si dhe për Sean Penn, ku këngëtarja përshkruan atmosferën e frikës që karakterizonte lidhjen e tyre në vitet ’80.

Sidoqoftë, i njëjti burim i besuar i “Mbretëreshës së Popit” nënvizon se, pavarësisht mesazheve të këngëve, aktori ka zënë gjithmonë vendin kryesor në zemrën e saj.

Ky publikim ka edhe një dimension tjetër emocional, duke sjellë një bashkëpunim të veçantë me Lourdes Leon, të bijën 29-vjeçare. Vetë Madonna ka ndarë se ishte Lourdes ajo që mori iniciativën për të krijuar së bashku një këngë, duke e parë këtë si një hap për të riparuar raportin mes tyre.

Burime pranë familjes tregojnë se dinamika nënë-bijë është përballur me sfida të konsiderueshme. Lourdes e ndiente se edukata e saj kishte qenë tepër shtrënguese, ndërsa ylli i muzikës mbartte ndjenjën e fajit për rritjen e së bijës në vorbullën e një famë globale dhe nën vëzhgimin e pandërprerë të opinionit.

Në këngën e përbashkët, këngëtarja i rikthehet një emri të dashur, duke e quajtur Lourdes “yll i vogël”, njësoj siç e kishte thirrur në albumin e vitit 1998, “Ray of Light”, në kohën kur vajza ishte veçse dy vjeç.

Një tjetër arsye për ftohjen e marrëdhënies ishte, sipas mikut të artistes, dëshira e Lourdes për të krijuar një personalitet të veçantë, përtej hijes së një nëne superyll. Gjatë viteve, Madonna është kritikuar vazhdimisht për qasjen e saj strikte ndërsa rrit gjashtë fëmijët, duke imponuar rregulla të rrepta në shtëpi, kontrollin e pajisjeve elektronike dhe një regjim jetese të disiplinuar.

Vetë Lourdes ka rrëfyer më parë se e ëma ishte “e fiksuar pas kontrollit” dhe se pas gjimnazit ndjeu një nevojë të fortë për pavarësi për të ndërtuar rrugën e saj në jetë.

Sipas të dhënave më të fundit, puna e përbashkët artistike i ka ndihmuar të dyja që të kapërcejnë përplasjet e së shkuarës dhe të riafrohen. Një person i afërt me familjen pohoi se krijimi i këngës ka qenë çelësi që Madonna dhe Lourdes të lënë pas konfliktet dhe të ecin përpara.