Sean Penn, dashuria më e madhe e Madonnës, ndërsa albumi i ri e ribashkon me Lourdes

Sean Penn vazhdon të konsiderohet dashuria më e madhe në jetën e Madonnës, ndonëse këngëtarja e përmend ish-bashkëshortin me nota kritike në albumin e saj më të fundit. Këtë e ka bërë të ditur një mik i afërt i artistes, duke iu referuar aktorit fitues të çmimit Oscar.

Page Six raporton se disa këngë të albumit “Confessions on a Dance Floor Part II” lidhen me Sean Penn, vëllain e ndjerë të Madonnës dhe njerkën e saj. Martesa e këngëtares me aktorin gjatë viteve ’80 ishte e bujshme, ndërsa në një nga këngët ajo përshkruan “ndjesinë e kërcënimit” që kishte përjetuar në atë marrëdhënie.

Pavarësisht mënyrës kritike me të cilën trajtohet ajo periudhë, një person pranë “Mbretëreshës së Popit” ka deklaruar se Penn mbetet njeriu që ajo ka dashur më shumë se kushdo tjetër.

Një tjetër pjesë personale e albumit është bashkëpunimi i Madonnës me vajzën e saj 29-vjeçare, Lourdes Leon. Sipas këngëtares, nisma për të krijuar një këngë së bashku erdhi nga vetë Lourdes, e cila e pa këtë si një mundësi për të shëruar raportin mes tyre.

Marrëdhënia e nënë e bijë nuk ka qenë gjithmonë e lehtë, sipas burimeve pranë artistes. Lourdes e konsideronte Madonnën shumë të rreptë gjatë viteve të rritjes, ndërsa këngëtarja përjetonte ndjenja faji për faktin se e kishte rritur të bijën mes famës globale dhe vëmendjes së pandërprerë publike.

Në duetin e tyre, Madonna e quan Lourdes “yll i vogël”. Të njëjtën nofkë ajo e kishte përdorur për vajzën edhe në albumin “Ray of Light”, të publikuar në vitin 1998, kur Lourdes ishte vetëm dy vjeçe.

Miku i këngëtares ka shpjeguar se largësia mes tyre lidhej gjithashtu me dëshirën e Lourdes për të krijuar identitetin e vet, pa u përkufizuar vetëm si vajza e një superylli.

Madonna është kritikuar prej vitesh për disiplinën e fortë me të cilën ka rritur gjashtë fëmijët e saj. Raportimet kanë bërë të ditur se në shtëpi ajo zbatonte rregulla të rrepta, kufizonte përdorimin e teknologjisë dhe kërkonte një mënyrë jetese të disiplinuar.

Edhe Lourdes ka deklaruar më parë se e ëma ishte “një maniake e kontrollit”. Pas mbarimit të shkollës së mesme, ajo ndjeu se duhej të jetonte në mënyrë të pavarur për të ngritur jetën e saj.

Sidoqoftë, marrëdhënia e tyre duket se ka marrë një kthesë të dukshme pozitive. Burime pranë familjes thonë se puna e përbashkët në muzikë i ka ndihmuar të kapërcejnë mosmarrëveshjet dhe të krijojnë sërish afërsi.

“Madonna dhe Lola kanë pasur vështirësi në marrëdhënien e tyre, por tani po shkojnë shumë mirë falë krijimit të kësaj kënge”, deklaroi për Page Six miku i artistes.