Rregulla të panegociueshme në sezonin e ri të “Për’puthen”, Heidi Baci paralajmëron masa deri në përjashtim

Sezoni i ri i emisionit të dashurisë “Për’puthen” nisi ditën e djeshme në Top Channel. Në hapje të programit, moderatorja Heidi Baci prezantoi rregulloren e re për konkurrentët, opinionistët dhe publikun, duke theksuar se ajo do të zbatohet nga të gjithë.

Sipas saj, rregullat janë të qarta dhe nuk mund të negociohen. Përgjatë këtij sezoni do të kërkohen respekt dhe përgjegjshmëri, ndërsa ndaj bullizimit, gjuhës së urrejtjes dhe dhunës do të ketë zero tolerancë.

Duke qenë se “Për’puthen” është një prej programeve më të ndjekura në Shqipëri dhe transmetohet 5 ditë në javë në ekranin kombëtar, Top Channel, produksioni ka vendosur kufij të përcaktuar për përmbajtjen dhe sjelljen në program.

Nuk do të pranohet përdorimi i gjuhës televizive të papërshtatshme, fyese apo degraduese. Po ashtu, do të ndalohet çdo material që nxit sjellje të dëmshme ose keqedukuese.

Rregullorja ndalon në mënyrë kategorike çdo formë dhune, qoftë fizike, verbale apo psikologjike. Gjithashtu, nuk lejohet promovimi, justifikimi apo glorifikimi i dhunës, ndërsa skenat eksplicite dhe përmbajtjet e papërshtatshme për fashën orare të programit janë të ndaluara rreptësisht.

Heidi Baci bëri të qartë se fjala e moderatores duhet respektuar nga të gjithë. Konkurrentët dhe opinionistët duhet t’u binden ndërhyrjeve, udhëzimeve dhe vendimeve të saj gjatë transmetimit, pasi autoriteti i moderatores në studio nuk është objekt negocimi.

Opinionistët mund të kritikojnë, të kundërshtojnë dhe të shprehin qëndrime të forta, por nuk mund të bullizojnë, ofendojnë apo poshtërojnë një konkurrent. Kritika duhet të mbetet pjesë e debatit televiziv dhe nuk duhet të shndërrohet në sulm personal. Roli i opinionistit është të ndikojë në dinamikën e programit dhe, mbi të gjitha, të ndihmojë në zhvillimin e historive të dashurisë, qoftë drejt një bashkimi apo drejt një ndarjeje kur kjo është e nevojshme.

Konkurrentët, të cilët u cilësuan si fytyra e një brezi të ri shqiptar, pritet të përfaqësojnë diversitetin, individualitetin dhe respektin reciprok. Ata nuk lejohen të krijojnë kontakte apo të zhvillojnë takime jashtë programit, përveç komunikimeve të përcaktuara dhe të miratuara nga produksioni.

Takimet private, drekat dhe darkat mes konkurrentëve jashtë ambienteve të programit nuk lejohen pa dijeninë e produksionit. Nëse një konkurrent konstatohet duke zhvilluar takime të tilla, materialet përkatëse do t’i paraqiten programit për verifikim.

Në fund, u përsërit se në “Për’puthen” nuk tolerohen gjuha e urrejtjes, bullizimi apo diskriminimi ndaj individëve ose komuniteteve. Shkelja e rregullores do të pasohet nga masa të ashpra, deri në përjashtim.