Nuk e përballon më presionin”/ Ariana Grande pezullon aktivitetet publike dhe heq dorë nga projekti i madh në Londër

Pas përfundimit të turneut “Eternal Sunshine”, i cili përfundon muajin e ardhshëm, Ariana Grande ka vendosur të distancohet përkohësisht nga angazhimet dhe ekspozimi publik.

Një përfaqësues i këngëtares dhe aktores amerikane i tha revistës People se artistja do të “bëjë një hap pas nga ekspozimi publik”, pas viteve të shoqëruara me “vëzhgim dhe kritika të pandërprera” nga mediat dhe publiku.

Vendimi ka ndikuar edhe në pjesëmarrjen e saj në ringjalljen e muzikalit të Stephen Sondheim, “Sunday in the Park with George”. Grande, 33 vjeçe, nuk do të interpretojë më në shfaqjen që ishte planifikuar të prezantohej në teatrin Barbican të Londrës gjatë vitit 2027.

Empire Street Productions, kompania përgjegjëse për organizimin e muzikalit, konfirmoi se Grande është larguar nga projekti dhe deklaroi se e respekton zgjedhjen e saj.

“Ne e dimë se ky nuk ka qenë një vendim i lehtë dhe e mbështesim plotësisht. I urojmë vetëm më të mirat,” thuhet në njoftimin e kompanisë.

Gjatë muajve të fundit, emri i Ariana Grande është përmendur shpesh në diskutime që lidhen me pamjen e saj dhe gjendjen shëndetësore, veçanërisht pas publikimit të albumit të fundit, “Petal”.

Videoklipi i këngës promovuese paraqet një këngëtare që përballet në mënyrë të përsëritur me gjykime gjatë audicioneve. Ajo dëgjon se “nuk është mjaftueshëm e mirë”, se “duhet të bëjë ndërhyrje estetike” dhe më pas se “ka bërë tepër ndërhyrje”. Në përfundim, personazhi përballet në mënyrë simbolike me kritikët e saj.

Sipas përfaqësuesit të artistes, Grande synon ta përfundojë turneun “e shëndetshme dhe e lumtur”, përpara se të marrë një pushim të merituar nga daljet dhe aktivitetet publike.

Mbështetja e fansave nuk ka munguar në rrjetet sociale, ku hashtag-u #WeLoveYouAriana është kthyer në trend.

Turneu do të vijojë fillimisht me koncertet në Çikago dhe më pas në Londër. Atje, këngëtarja do të japë dhjetë shfaqje në arenën O2, përpara mbylljes zyrtare të turneut më 1 shtator. Ende nuk është bërë i ditur emri i artistit që do ta zëvendësojë në muzikalin londinez.