Madonna: Sean Penn mbetet dashuria e pashuar, ndërsa dueti me vajzën Lourdes rikthen harmoninë familjare

Megjithëse në albumin e saj të fundit Madonna shprehet me nota kritike për ish-bashkëshortin Sean Penn, një burim i afërt me këngëtaren ka rrëfyer se aktori i vlerësuar me Oscar është pa dyshim dashuria më e fuqishme që ajo ka përjetuar ndonjëherë.

Sipas informacioneve të siguruara nga Page Six, projekti i ri muzikor i titulluar “Confessions on a Dance Floor Part II” përmban aludime për të vëllanë e ndjerë, njerkën dhe ish-bashkëshortin e saj Sean Penn, lidhja me të cilin shkaktoi jehonë të madhe mediatike në dekadën e ’80-të. Në një nga këngët, ajo përshkruan ndjesinë e të qenit e frikësuar që shoqëronte atë raport.

Pavarësisht këtyre teksteve, i njëjti mik i ngushtë i “Mbretëreshës së Popit” pohon se Sean Penn mbetet personi për të cilin ajo ka ushqyer ndjenjat më të thella.

Ky album shënon gjithashtu një kapitull prekës në jetën personale të artistes, duke sjellë një bashkëpunim muzikor me të bijën e saj 29-vjeçare, Lourdes Leon. Vetë Madonna ka rrëfyer se ideja për të shkruar një këngë së bashku erdhi nga Lourdes, si një përpjekje për të riparuar lidhjen mes tyre.

Rrethi i saj tregon se marrëdhënia nënë e bijë ka kaluar nëpër faza të trazuara. Lourdes ka ndier se e ëma kishte qenë tepër strikte gjatë fëmijërisë, ndërsa Madonna mundohej nga ndjenja e fajit për ta rritur të bijën në mes të vëmendjes globale dhe ekspozimit të pandërprerë publik.

Në duetin e tyre, këngëtarja i drejtohet së bijës me emrin e përkëdhelur “yll i vogël”, i njëjti epitet që kishte përdorur për të në albumin “Ray of Light” të vitit 1998, kur Lourdes ishte fare e vogël, vetëm dy vjeçe.

Sipas të njëjtit burim, distanca mes tyre u thellua edhe nga dëshira e Lourdes për të krijuar një identitet të veçantë, përtej etiketës së së bijës së një ikone botërore.

Prej vitesh, Madonna është vënë në shënjestër të kritikave për stilin e saj të rreptë prindëror me gjashtë fëmijët. Raportimet flasin për rregulla të hekurta në shtëpi, ku teknologjia ishte e kufizuar dhe mbizotëronte një disiplinë e ashpër jetese.

Edhe vetë Lourdes e ka pranuar hapur në të kaluarën se e ëma ishte jashtëzakonisht kontrolluese dhe se pas mbarimit të gjimnazit, ajo ndjeu një nevojë të fortë për pavarësi për të nisur rrugëtimin e saj personal.

Megjithatë, tashmë duket se raporti mes tyre ka hyrë në një fazë shumë më pozitive. Sipas personave pranë familjes, ky bashkëpunim artistik u ka dhënë mundësinë të dyjave të tejkalojnë konfliktet e së kaluarës dhe të rilidhen thellësisht.

“Madonna dhe Lola kanë pasur përplasjet e tyre, por tani gjërat po ecin mrekullisht, dhe kjo falë procesit të krijimit të kësaj kënge”, deklaroi miku i këngëtares për Page Six.