Madonna ende e konsideron Sean Penn dashurinë e jetës, ndërsa albumi i ri e ribashkon me Lourdes

Sean Penn vazhdon të jetë dashuria më e madhe e jetës së Madonnës, pavarësisht se këngëtarja përfshin në albumin e saj më të fundit edhe referenca kritike ndaj ish-bashkëshortit. Këtë e ka bërë të ditur një mik i afërt i artistes, ndërsa aktori është fitues i çmimit Oscar.

Page Six raporton se disa këngë të albumit “Confessions on a Dance Floor Part II” lidhen me vëllain e ndjerë të Madonnës, njerkën e saj dhe Sean Penn. Këngëtarja dhe aktori patën një martesë të trazuar gjatë viteve ’80, ndërsa në njërën prej këngëve ajo përshkruan “ndjesinë e kërcënimit” që kishte përjetuar në atë marrëdhënie.

Megjithatë, sipas mikut të “Mbretëreshës së Popit”, përmbajtja e këtyre referencave nuk e ndryshon faktin se Penn mbetet personi që Madonna ka dashur më shumë se kushdo tjetër.

Një tjetër pjesë thellësisht personale e albumit është dueti i këngëtares me vajzën e saj 29-vjeçare, Lourdes Leon. Madonna ka treguar se nisma për ta shkruar së bashku këngën erdhi nga vetë Lourdes, e cila e pa këtë bashkëpunim si një mënyrë për të shëruar raportin mes tyre.

Marrëdhënia e nënë e bijë ka kaluar etapa të vështira, sipas burimeve pranë artistes. Lourdes e konsideronte Madonnën tepër të rreptë gjatë viteve kur po rritej, ndërsa këngëtarja mbante ndjenjën e fajit që vajza e saj ishte rritur mes famës botërore dhe vëmendjes së pandërprerë publike.

Në këngën që kanë realizuar së bashku, Madonna e quan Lourdes “yll i vogël”. Të njëjtën nofkë ajo e kishte përdorur për të edhe në albumin “Ray of Light” të vitit 1998, kur vajza ishte vetëm dy vjeçe.

Miku i këngëtares ka shpjeguar se largësia mes tyre u ndikua edhe nga dëshira e Lourdes për të krijuar identitetin e vet, pa u përkufizuar vetëm si vajza e një superylli.

Për shumë vite, Madonna është kritikuar për disiplinën e fortë me të cilën ka rritur gjashtë fëmijët e saj. Raportimet thonë se në shtëpi ajo zbatonte rregulla të rrepta, kufizonte përdorimin e teknologjisë dhe kërkonte një mënyrë jetese të disiplinuar.

Lourdes ka deklaruar më herët se e ëma ishte “një maniake e kontrollit”. Ajo ka pranuar gjithashtu se, pasi mbaroi shkollën e mesme, ndjeu nevojën të jetonte në mënyrë të pavarur dhe të ndërtonte jetën e saj.

Tashmë, megjithatë, lidhja e tyre duket se është përmirësuar dukshëm. Burime pranë familjes bëjnë të ditur se puna e përbashkët në muzikë i ka ndihmuar të kapërcejnë mosmarrëveshjet dhe të krijojnë sërish afërsi.

“Madonna dhe Lola kanë pasur vështirësi në marrëdhënien e tyre, por tani po shkojnë shumë mirë falë krijimit të kësaj kënge”, deklaroi për Page Six miku i artistes.