Lëvizjet e shkurtra në rutinën e përditshme mund të mbrojnë zemrën dhe të ulin rrezikun e vdekjes së parakohshme

Lëvizja e këmbëve kur jemi ulur, ngjitja e shkallëve, punët e shtëpisë apo ecja gjatë një telefonate janë veprime të thjeshta që mund të ndihmojnë në pakësimin e rrezikut të sëmundjeve kardiovaskulare dhe vdekjes së parakohshme.

Studimet e fundit sugjerojnë se edhe periudhat e shkurtra të lëvizjes sjellin përfitime për shëndetin, pa qenë e nevojshme të planifikohet kohë e posaçme për stërvitje. Kjo mund të jetë veçanërisht e vlefshme për njerëzit që qëndrojnë ulur për pjesën më të madhe të ditës.

Aktiviteti fizik i rastësishëm përfshin lëvizjet që bëhen jashtë ushtrimeve të organizuara, si kopshtaria, punët e shtëpisë dhe lojërat me fëmijët. Edhe ndërrimi i pozicionit, rrotullimi i shpatullave apo lëvizja e këmbëve gjatë qëndrimit ulur mund të vënë në punë muskujt.

Një studim i publikuar në vitin 2024 arriti në përfundimin se katër minuta në ditë me periudha të shkurtra aktiviteti, secila më pak se një minutë, mund të ndihmojnë në kundërbalancimin e rrezikut të shtuar kardiovaskular që shoqëron qëndrimin e gjatë ulur.

Hulumtimi përfshiu të dhënat e më shumë se 22 mijë personave në Mbretërinë e Bashkuar, të cilët u monitoruan për tetë vjet. Sipas rezultateve, aktiviteti i rastësishëm në nivele më të larta mund të zbusë rreziqet shëndetësore te personat që qëndrojnë ulur mbi 11 orë në ditë.

Për të shtuar lëvizjen nuk është e domosdoshme të shkohet në palestër. Studiuesit përmendin ecjen më të shpejtë, zgjedhjen e shkallëve në vend të ashensorit, bartjen e çantave të pazarit dhe ecjen gjatë telefonatave si mënyra të lehta për ta bërë rutinën më aktive.

Lëvizjet mund të lidhen edhe me zakonet e përditshme: për shembull, ngritja e thembrave gjatë larjes së dhëmbëve ose kryerja e ushtrimeve të lehta të këmbëve kur punohet në tavolinë.

Ekspertët paralajmërojnë se qëndrimi për kohë të gjatë ulur shoqërohet me rreziqe shëndetësore. Ndërprerja e tij me lëvizje të shkurtra mund të ndihmojë qarkullimin e gjakut dhe kontrollin e nivelit të sheqerit në gjak.

Edhe në ditët kur mungon koha për një stërvitje të plotë, shtimi i lëvizjeve të vogla në aktivitetet e zakonshme mund të kontribuojë në ruajtjen e shëndetit afatgjatë.