Jessie J zbulon fundin e lidhjes 5-vjeçare: Do ta rrisim djalin bashkë si prindër

Artistes britanike Jessie J i ka ardhur fundi i marrëdhënies me basketbollistin Chanan Coleman, pas pesë vitesh së bashku. Lajmin e bëri të ditur vetë këngëtarja, e cila ndan me ish-partnerin një djalë.

Përmes një njoftimi në rrjetin social Instagram, ajo e përshkroi këtë fazë si një moment të vështirë dhe plot dhimbje për të dy, duke vënë në dukje se në qendër të vendimit ka qenë e ardhmja e të birit, Skye.

“Së fundmi, unë dhe Chanan kemi vendosur t’i japim fund lidhjes sonë sentimentale. Është një moment i trishtë dhe sfidues, por jemi të fokusuar që këtë tranzicion ta menaxhojmë privatisht dhe me një frymë pozitive, për t’i garantuar djalit tonë një ambient të lumtur e të shëndetshëm”, ka shkruar Jessie J.

Ajo sqaroi se arsyeja e publikimit personal të lajmit ishte nevoja për të parandaluar hamendjet dhe thashethemet rreth jetës së tyre private.

Pavarësisht ndarjes, këngëtarja siguroi se raporti mes tyre do të ruajë harmoninë dhe se do të jenë gjithmonë pranë njëri-tjetrit si miq dhe bashkëprindër.

“Do të vijojmë të mbështetemi reciprokisht me dashuri, nderim dhe kujdes, sidomos në rolin tonë si prindër të Skye. Nëse na shihni së bashku si familje ose duke bashkëvepruar në rrjete sociale, kjo ndodh sepse jemi duke e rritur së bashku djalin tonë, mbi themelet e një miqësie të shëndoshë dhe pozitive”, shtoi ajo.

Historia e tyre nisi në vitin 2021 dhe në vitin 2023 ata mirëpritën në jetë Skye. Edhe tani që rrugët e tyre janë ndarë, çifti ka bërë të ditur se do të mbetet i bashkuar në misionin për t’i ofruar fëmijës një rritje sa më të qetë dhe të ekuilibruar.