Fluks në Pediatrinë e Vlorës, deri në 80 vizita ditore nga virozat dhe alergjitë

Pediatria e Spitalit Rajonal të Vlorës po përballet me një shtim të vizitave, si pasojë e temperaturave të larta të verës dhe numrit të madh të turistëve.

Mjekja e pavijonit, Rita Llanaj, bën të ditur se gjatë kësaj periudhe paraqiten dhjetëra pacientë çdo ditë. Numri i vizitave arrin në rreth 70-80 në ditë, ndërsa janë regjistruar edhe 35 shtrime.

Fëmijët paraqiten kryesisht me viroza sezonale, shqetësime respiratore, alergji dhe pickime nga insektet.

Mes pacientëve, sipas mjekes, ka shumë fëmijë nga qytete të tjera, si edhe turistë që po kalojnë pushimet në Vlorë. Simptomat e tyre lidhen në pjesën më të madhe me vapën dhe ekspozimin në mjedis.

Bluzat e bardha rekomandojnë që fëmijët të mos ekspozohen në diell gjatë orëve të pikut. Prindërit duhet të kërkojnë menjëherë ndihmë mjekësore nëse fëmijët kanë temperaturë të lartë, vështirësi në frymëmarrje ose shenja të tjera shqetësuese.