Dueli mbi ujë/ Momenti kur Zuckerberg sfidon kampionin e UFC-së dhe përfundon në Liqenin Tahoe

Themeluesi i Meta-s, Mark Zuckerberg, vazhdoi pasionin e tij për artet marciale në një mënyrë aspak të zakonshme, duke zhvilluar një përballje fizike me luftëtarin e njohur të UFC-së, Merab Dvalishvili, pikërisht mbi një barkë në mes të Liqenit Tahoe.

Një video e këtij takimi u shpërnda nga vetë Zuckerberg në Instagram, e regjistruar nga një arbitër dhe disa të tjerë që ndodheshin në mjetin lundrues.

Momenti më i habitshëm i filmit vjen që në fillim, teksa Dvalishvili e rrëmben Zuckerberg-un dhe e flak në ujërat e akullta të liqenit. Sidoqoftë, drejtuesi i Facebook-ut dëshmoi se angazhimi i tij me artet marciale shkon përtej ndjekjes pasive të garave.

Gjatë përleshjes, Zuckerberg këmbeu goditje me grushte dhe shkelma me Dvalishvilin dhe në disa raste madje duket sikur arrin ta shtrijë përdhe kundërshtarin.

Dvalishvili, i cili më herët ka mbajtur titullin kampion në kategorinë e peshave të lehta në UFC dhe mbetet një figurë qendrore e divizionit, nuk u duk se po ushtronte presion të madh ndaj amatorit. Megjithatë, herë pas here ai bëri të qartë hendekun që ndan një luftëtar profesionist elitar nga Zuckerberg-u.

Ndeshjen e panë spektatorë që lundronin me barka aty pranë, ndërsa në një çast u shfaq edhe Priscilla Chan, gruaja e Zuckerberg-ut, e cila po voziste një kajak.

Duke vëzhguar bashkëshortin e saj që përballej pa këmishë, Chan bëri një koment me ironi: Marku nuk mban bluzë.

Zuckerberg sqaroi se pikërisht Dvalishvili kishte ngulmuar që ai të hiqte rrobën e sipërme, me arsyetimin se në këtë mënyrë “të jep më shumë pamjen e një luftëtari” dhe Chan u duk se e konfirmoi këtë pohim.

Klima mes dy burrave mbeti miqësore, pavarësisht goditjeve që shkëmbyen. Madje, Dvalishvili i kishte propozuar më parë Zuckerberg-ut që një aktivitet të tillë ta përsërisnin “çdo ditë”.

Ky nuk ishte takimi i tyre i parë. Të dy ishin ndeshur edhe në muajin dhjetor, kur zhvilluan disa raunde brenda një ringje.

Vitet e fundit, themeluesi i Facebook-ut është shndërruar në një tifoz të flaktë të arteve marciale të përziera dhe ka parë nga afër evente të ndryshme në shoqërinë e presidentit dhe CEO-s së UFC-së, Dana White.

MMA është kthyer në një nga hobiët e tij më të dukshëm jashtë botës së teknologjisë dhe herë pas here Zuckerberg ndan me publikun imazhe nga seancat e tij përgatitore.

Përballja në Liqenin Tahoe pati një fund po aq dramatik sa edhe nisja. Dvalishvili e rrëmbeu sërish Zuckerberg-un dhe e shtyu në ujë, para se të zhytej edhe vetë në liqen.

Në këtë mënyrë, dueli i dytë i regjistruar mes tyre u mbyll me të dy trupat që përfunduan brenda ujërave të ftohta të Liqenit Tahoe.