Diddy ngre padi për shpifje, kërkon 100 mln $ dëmshpërblim

Sean Combs, i njohur si Diddy, ka depozituar një padi në Gjykatën Federale të Distriktit Jugor të New York-ut kundër Courtney Burgess, Ariel Mitchell dhe kompanisë mediatike Nexstar Media Inc.

Në padi thuhet se ata kanë krijuar një skemë të qëllimshme për të fabrikuar dhe transmetuar lajme të rreme, përfshirë video të trilluara të sulmeve seksuale, një raport të rremë policie për përdhunim dhe regjistrime sekrete të përdorura për shantazh.

Sipas padisë, avokatja Ariel Mitchell, e cila kohët e fundit thuhet se i ka dhënë ryshfet një dëshmitari në gjyqin kundër reperit, i ka përsëritur akuzat e fabrikuara edhe në televizion kombëtar. Ajo ka pretenduar se ekzistonte një raport policie që konfirmonte akuzat se Diddy kishte përdhunuar një grua në mars të vitit 2018.

Shtohet po ashtu se kompania televizive i ka transmetuar këto deklarata me pakujdesi totale.

Combs kërkon dëmshpërblim prej jo më pak se 100 milionë dollarë për dëmin që i është shkaktuar reputacionit të tij.