Bleona Qereti rikthehet në Shqipëri pas qëndrimit në SHBA, artistja gati të risjellë hitet e saj të vjetra

Bleona Qereti po hap një kapitull të ri në karrierën e saj, duke iu rikthyer repertorit në shqip që e bëri një prej emrave më të njohur të muzikës shqiptare. Këngëtarja ka nisur punën për rixhirimin dhe ripërpunimin e 20 këngëve, të cilat do të publikohen në kuadër të dy albumeve vizuale.

Projekti nis me “ERA”, një version i ri i një prej këngëve të saj të hershme. Përmes këtij rikthimi, Bleona synon t’i japë repertorit të vjetër një tjetër trajtim, duke e përshtatur me standardet dhe vizionin artistik që ka sot. Katalogu i saj në gjuhën shqipe ishte larguar më herët nga platformat digjitale me vendim të vetë këngëtares. Kjo ndodhi në periudhën kur Bleona po përqendrohej te ndërtimi i një karriere në tregun ndërkombëtar dhe te muzika në gjuhën angleze. Tashmë, pas disa vitesh, ajo po rikthen një pjesë të rëndësishme të historisë së saj muzikore. Rikthimi i këngëve shqiptare nuk do të thotë se Bleona po i largohet muzikës ndërkombëtare.

Paralelisht, ajo po sjell materiale të reja në anglisht, mes tyre “RIDE IT” dhe “BOY GONE BAD”, ndërsa në vijim pritet edhe një EP e prodhuar nga producenti i njohur Timbaland. Projekti i ri bashkon dy periudha të rëndësishme të rrugëtimit të saj artistik. Në Shqipëri, Bleona publikoi tetë albume në gjuhën shqipe, ndërsa më pas u zhvendos drejt tregut amerikan, ku ndërtoi një karrierë ndërkombëtare. Në këtë fazë të karrierës, ajo ka arritur edhe një rezultat të rëndësishëm në tregun amerikan, duke u renditur në vendin e parë të Billboard Dance Club Songs me këngën “I Don’t Need Your Love”.

Krahas muzikës, Bleona është angazhuar edhe në projekte kinematografike. Rikthimi te repertori i vjetër vjen ndërkohë që artistët po i kushtojnë gjithnjë e më shumë rëndësi kontrollit mbi katalogët e tyre muzikorë dhe mënyrës se si trashëgimia e tyre artistike prezantohet te publiku.Për Bleonën, ky projekt duket se shkon përtej nostalgjisë. 20 këngët e ripunuara do të shërbejnë si një urë mes fillimeve të saj në muzikën shqiptare dhe eksperiencës së fituar gjatë viteve në skenën ndërkombëtare, duke i dhënë një tjetër jetë këngëve me të cilat nisi rrugëtimin e saj.