Ariana Grande shpjegon tërheqjen e përkohshme nga jeta publike: Ishte planifikuar prej kohësh, jo një vendim impulsiv

Pas lajmit se do të largohet përkohësisht nga jeta publike në përfundim të turneut “Eternal Sunshine”, Ariana Grande ka folur për herë të parë rreth këtij vendimi.

Në koncertin e zhvilluar të hënën në Çikago, artistja u shpjegoi fansave se tërheqja e saj nuk lidhet me kritikat dhe as nuk është vendosur me nxitim. Grande deklaroi para të pranishmëve se ky nuk ishte një reagim i momentit apo një zgjedhje impulsive, por diçka që e kishte planifikuar në heshtje prej shumë kohësh.

Këngëtarja tha se i kuptonte shqetësimet e fansave, të cilët dyshonin se komentet negative mund të kishin ndikuar tek ajo, por bëri të qartë se situata ishte tjetër. Sipas saj, vendosja e kufijve është e nevojshme dhe njerëzit herë pas here kanë nevojë të pushojnë. Ajo shtoi se as kritikat dhe as zhurma përreth nuk mund ta dobësojnë dashurinë që ndan me admiruesit e saj.

Përfaqësuesi i Grandes bëri të ditur se ajo do të marrë një “pushim të merituar”, pas një periudhe gjatë së cilës ka qenë vazhdimisht nën vëmendjen dhe shqyrtimin e publikut dhe mediave.

“Eternal Sunshine” përfundon më 1 shtator, pas 10 koncerteve në Londër. Si pasojë e tërheqjes së përkohshme, Ariana Grande nuk do të marrë pjesë në produksionin e muzikalit “Sunday in the Park with George” në Barbican të Londrës, ku ishte parashikuar të interpretonte së bashku me aktorin Jonathan Bailey.

Gjatë viteve të fundit, pamja fizike dhe gjendja shëndetësore e këngëtares kanë qenë shpesh objekt spekulimesh. Pas njoftimit të saj për pushimin, fansat e mbështetën përmes postimeve në rrjetet sociale, ndërsa hashtag-u #WeLoveYouAriana u kthye në trend.