Zhernovski: Modeli mediatik i Vuçiqit po shtrihet në Maqedoni, Mickoski synon kontrollin e informacionit

Andrej Zhernovski, sekretar për bashkëpunim ndërkombëtar në LSDM, deklaroi se në Maqedoni ka nisur zbatimi i një skenari për kontrollin e hapësirës mediatike, të ngjashëm me atë që, sipas tij, përdor Aleksandar Vuçiq në Serbi.

Ai tha se për këtë zhvillim kishte paralajmëruar edhe dy muaj më parë, duke e përshkruar situatën si një operacion për krijimin e errësirës mediatike nën patronazhin dhe drejtimin e drejtpërdrejtë të Vuçiqit.

Zernovski bëri të ditur se një ditë më parë në Serbi u përmbyll shitja e mediave të Adria News Network te grupi investues Alpac Capital. Në këtë rrjet përfshihen N1, Nova, Radar, Forbes Serbia dhe Danas.

Sipas tij, Alpac Capital ka lidhje të afërta me Viktor Orbanin, për të cilin ka shërbyer si bashkëpunëtor, këshilltar dhe mik. Zernovski kujtoi se në vitin 2022 ky grup bleu shumicën e aksioneve të Euronews, ndërsa më vonë u raportua se 45 milionë euro të transaksionit ishin siguruar nga një fond shtetëror hungarez dhe 12,5 milionë euro përmes një kompanie të lidhur me operacionet e komunikimit të qeverisë hungareze.

“Nuk bëhet fjalë për marrëveshje të veçuara biznesi, por për një plan që synon kontrollin e plotë të hapësirës mediatike në vendin tonë. Ky model është vendosur në Serbi dhe tani po aplikohet edhe tek ne”, deklaroi ai, duke shtuar se marrja e licencës për operatorin e tretë mobil në Maqedoni nga kompania hungareze 4iG nuk është rastësi.

Zhernovski theksoi se kjo çështje duhet trajtuar si një zhvillim shumë më serioz sesa një temë e zakonshme politike apo ekonomike. Ai tha se po zgjerohet prania e mediave nga “bota serbe”, të cilat i konsideron të afërta me pushtetin e Vuçiqit.

Ai iu referua edhe raporteve të dy viteve të fundit nga Brukseli, përfshirë ato të Parlamentit Evropian dhe Komisionit Evropian, ku flitet për ekzistencën dhe ndikimin e “botës serbe” në Maqedoni.

Sipas informacioneve të LSDM-së, një prej skenarëve parashikon hyrjen e grupit ALO në tregun televiziv të Maqedonisë, me mundësinë e marrjes së pronësisë së Nasha TV. Në këtë proces, sipas Zhernovskit, rol të rëndësishëm pritet të ketë Ivana Taleska përmes projektit Euronews, i cili nisi në shtator.

Zhernovski përmendi gjithashtu Latasin, të cilin e cilësoi si zbatues të politikës së Mickoskit. Ai pretendoi se pushteti po e ndjek këtë qasje për të shmangur pyetjet mbi krimet, tenderët dhe mungesën e reformave, në një kohë kur, sipas tij, vendi nuk ka perspektivë evropiane.

“Synimi është që qytetarët të dëgjojnë vetëm një version të së vërtetës, atë që do t’u paraqitet si e vetmja e mundshme. Për fat të keq, vendi po shkon drejt një errësire mediatike dhe një jete ‘demokratike’ pa media të lira, pa kritikë dhe pa të vërtetën”, tha ai.

Në përfundim, Zhernovski pyeti nëse tani bëhet e qartë arsyeja pse Muçunski dha intervistë pikërisht për Euronews. Ai nënvizoi se, sipas tij, nuk bëhet fjalë vetëm për pronësinë e një televizioni apo portali, por për kontrollin e përgjithshëm të hapësirës publike në vend.