Zekolli Shaqiri: Projekti Tetovë–Prizren avancon drejt tenderimit të tunelit

Zv/ministrja e Transportit, Kaltrina Zekolli Shaqiri, zhvilloi sot në Ministrinë e Transportit një takim me grupin punues për rrugën Tetovë–Prizren. Takimi u mbajt me përbërjen e re të delegacionit nga Kosova, të drejtuar nga zv/ministri i Infrastrukturës dhe Transportit i Kosovës, Zef Morina.

Gjatë diskutimeve u analizuan çështjet administrative që burojnë nga Marrëveshja ndërqeveritare, si edhe ecuria e angazhimeve të të dyja palëve. Vëmendje iu kushtua punës në terren dhe kompletimit të dokumentacionit teknik.

Delegacionet ranë dakord për veprimet konkrete që do të ndërmerren në vijim për zhvillimin e projektit, veçanërisht për nisjen e procedurës së tenderimit për projektimin e tunelit ndërkufitar.

“Jemi tërësisht të angazhuar që, përmes vullnetit të përbashkët dhe bashkëpunimit të ndërsjellë, ta nisim sa më shpejt fazën e tenderimit dhe ta avancojmë këtë projekt strategjik”, deklaroi Zekolli Shaqiri.

Ndërtimi i rrugës Tetovë–Prizren parashikon një korridor të ri strategjik që do të lidhë infrastrukturën e Maqedonisë së Veriut me atë të Kosovës, duke kontribuar në forcimin e marrëdhënieve ekonomike, tregtare dhe të transportit mes dy vendeve.