Zajkova: Listat e hapura u japin qytetarëve lirinë për të zgjedhur, nuk përbëjnë tradhti

Kryetarja e Partisë Liberale Demokratike (PLD), Monika Zajkova, deklaroi se partia që drejton është tërësisht e pavarur, me identitet të qartë ideologjik dhe e qëndrueshme në qëndrimet e saj. Sipas saj, PLD-ja nuk i shërben selisë së asnjë partie, por zhvillon bisedime me të gjithë aktorët, përfshirë biznesin, organizatat joqeveritare dhe qytetarët, me synimin për të hartuar zgjidhje që ndikojnë drejtpërdrejt në përmirësimin e standardit të jetesës, siç është heqja e tarifave bankare.

Zajkova theksoi se PLD-ja mbetet e vendosur në kërkesën për krijimin e një zone të vetme zgjedhore dhe për aplikimin e listave të hapura. Ajo tha se ka ardhur koha që drejtuesve të partive t’u hiqet monopoli për përzgjedhjen e njerëzve të tyre në listat parlamentare dhe që qytetarët të kenë mundësinë të zgjedhin drejtpërdrejt përfaqësuesit e tyre.

“PLD-ja nuk dëshiron dhe nuk ka asnjë motiv të fshehtë për të ndërhyrë në partitë e tjera, ndërsa as nuk ka mundësi ta bëjë një gjë të tillë. Çfarë ndodh në oborret e tjera politike është përgjegjësi e tyre. Ndërkaq, fakti që ne komunikojmë me të gjithë, me të dyja partitë, sektorin joqeveritar dhe biznesin, është krejtësisht normal, sepse politikat që hartojmë u drejtohen qytetarëve. Nëse për dikë diskutimi për listat e hapura apo lobimi për një aleancë që do të mundësonte këto zgjidhje përbën mëkatin dhe tradhtinë më të madhe, atëherë nuk kemi problem të na quajnë ‘tradhtarë’”, u shpreh ajo.

Kryetarja e PLD-së vuri në dukje gjithashtu se protestat masive në Evropë dhe në rajon po marrin përmasa më të mëdha, pikërisht për shkak të shpërfilljes së gjatë të problemeve konkrete nga qeveritë që kanë preferuar të shohin realitetin përmes “syzeve rozë”. Sipas saj, mungesa e drejtësisë sjell grumbullimin e zemërimit, ndaj PLD-ja kërkon hapje, reforma dhe një sistem të pastër, në vend që problemet të fshihen nën qilim./Telegrafi/