Monika Zajkova merr postin e nënkryetares në Asamblenë Parlamentare të OSBE-së

Monika Zajkova, kryetare e PLD-së dhe deputete në Kuvendin e Maqedonisë, është zgjedhur nënkryetare e Asamblesë Parlamentare të OSBE-së, bëri të ditur PLD-ja.

Zgjedhja e saj u realizua në sesionin e 33-të vjetor të Asamblesë Parlamentare të OSBE-së, që u mbajt në Hagë të Holandës, ku kandidatura e Zajkovës siguroi mbështetje të konsiderueshme nga delegacionet parlamentare të 57 shteteve nga Evropa, Amerika e Veriut dhe Azia Qendrore.

Rëndësia e këtij rezultati qëndron edhe te fakti se ai u arrit përmes një gare të drejtpërdrejtë dhe votimi të fshehtë mes disa kandidatëve, pa automatizëm dhe pa kuota të paracaktuara. Në këtë proces, ajo la pas përfaqësuesit e Polonisë, Francës dhe Sllovenisë. Fitorja në një garë kaq të fortë, sipas njoftimit, përbën dëshmi të reputacionit ndërkombëtar dhe të vlerësimit të lartë që Zajkova ka mes parlamentarëve në botë.

“Nënkryetari i Asamblesë Parlamentare të OSBE-së është një njohje e madhe ndërkombëtare, por jo vetëm për mua personalisht ose për PLD-në, por për të gjithë bashkëqytetarët e mi në Maqedoni. Ky është një sukses për secilin prej njerëzve tanë, jo vetëm nga zona ime zgjedhore dhe jo vetëm për ata që votuan për mua në zgjedhjet në vend. Me këtë fitore të madhe në Hagë, ne dëshmojmë se mund të konkurrojmë në kushte të barabarta në zgjedhje të hapura me përfaqësuesit e demokracive më të larta dhe më të fuqishme në botë.

Më në fund duhet të fillojmë të besojmë fort në veten tonë, në kapacitetin tonë dhe në atë që ne nga Maqedonia i ofrojmë Evropës dhe botës – sot, por edhe në të ardhmen! Jam mirënjohëse për unitetin e demonstruar të delegacionit maqedonas dhe për besimin e madh të kolegëve të mi nga 57 vendet anëtare të OSBE-së, me të cilët do të vazhdojmë të punojmë intensivisht për krijimin e mekanizmave për një shkallë më të madhe të pjesëmarrjes demokratike dhe zgjidhjen e shpejtë të konflikteve të mundshme”, deklaroi Zajkova pas zgjedhjes së saj.