VLEN: BDI-ja, që vodhi qindra miliona, tani po paraqitet si hetuese

Sipas VLEN-it, BDI-ja tentoi edhe sot të sajojë një aferë mbi investime të ligjshme, të deklaruara publikisht dhe tërësisht të verifikueshme. Duke u mbështetur te të dhënat që Nedim Rama i ka dorëzuar vetë në KSHPK, partia që për dy dekada ka ngritur perandori biznesi familjar doli me një deklaratë të mbushur me pyetje, por pa ofruar asnjë dëshmi.

Fillimisht, duhen paraqitur faktet.

Gjatë viteve të fundit janë kryer disa investime në aksione, ndërsa vlera e përgjithshme e deklaruar e portofolit të tij arrin në rreth 30.000 euro.

Nedim Rama i ka evidentuar të gjitha veprimtaritë e tij financiare dhe jofinanciare, në përputhje me ligjin, përmes një dokumenti zyrtar dhe publik që mund të konsultohet nga çdo qytetar. Vetë ky veprim i kundërshton drejtpërdrejt aludimet e ngritura nga BDI-ja.

Blerja dhe shitja e aksioneve të “Mercedes”, “Novo Nordisk”, “SOFI Technologies” apo kompanive të tjera përbën një veprimtari krejtësisht të ligjshme, të lejuar nga rregulloret që zbatohen në vend, veçanërisht kur bëhet fjalë për një sasi të vogël aksionesh. Nga këto transaksione janë realizuar edhe fitime kapitale, të cilat janë deklaruar në mënyrë transparente dhe për të cilat shtetit i është paguar tatimi përkatës.

Paraqitja e pasurive të deklaruara publikisht si diçka e “zbuluar” apo si kapital i fshehur është manipulim i rëndë.

BDI-ja nuk solli asnjë fakt që të tregojë se qoftë edhe një denar i vetëm për blerjen e aksioneve ka ardhur nga “NOMAGAS”, buxheti shtetëror, ndonjë tender publik apo një burim i kundërligjshëm. Arsyeja është se edhe vetë e dinë se një pretendim i tillë nuk është i vërtetë.

E vetmja gjë që paraqitën ishin informacionet që Nedim Rama ia kishte dorëzuar vetë KSHPK-së, në mënyrë publike dhe transparente.

VLEN-i nuk kundërshton verifikimin nga cilido institucion kompetent. Të gjitha investimet, pagesat dhe transaksionet mund të kontrollohen. Pikërisht për këtë qëllim ato janë raportuar publikisht në KSHPK.

Këto janë faktet. Meqë BDI-ja ka vendosur të marrë rolin e hetuesit financiar, atëherë duhet të japë përgjigje për disa çështje.

Cili është burimi i qindra miliona eurove në prona dhe biznese me të cilat lidhet familja e Ali Ahmetit vetëm në territorin e Shkupit?

Si arriti të lulëzojë biznesi i vëllait të Bujar Osmanit gjatë kohës kur Osmani ushtronte disa prej funksioneve më të larta shtetërore dhe çfarë ndodhi më pas me atë biznes?

Çfarë lidhjesh institucionale dhe shtetërore u përdorën për t’u hapur rrugë bizneseve dhe angazhimeve të vëllait të Arbër Ademit?

Si ndodhi që, pas më shumë se dy dekadash në pushtet, familjet e drejtuesve të BDI-së u shndërruan në pronare kompanish, qendrash biznesi, pasurish të paluajtshme, koncesionesh dhe biznesesh miliona dollarëshe?

Pikërisht këtyre pyetjeve BDI-ja u shmanget. Këto janë milionat për të cilat ajo nuk dëshiron të japë kurrë përgjigje.

Në vend që të sqarojë këto çështje, partia gjatë pushtetit të së cilës u zgjeruan perandoritë e bizneseve familjare po tenton sot të fabrikojë një “mashtrim” nga informacionet që Nedim Rama ua ka dorëzuar vetë institucioneve dhe që gjenden të publikuara në faqen e internetit të KSHPK-së.

Kjo përbën një përpjekje paniku për t’u larguar nga çështja e milionave të tyre.

Nedim Rama e ka deklaruar pasurinë e vet, ndërsa BDI-ja fshihet pas deklaratave të ndërtuara vetëm me pyetje.

Çështja e qindra miliona eurove, për të cilat BDI-ja hesht dhe që fshihen pas emrave të fëmijëve e vëllezërve të funksionarëve të saj më të lartë, është dhe do të vazhdojë të mbetet një aferë.