VLEN akuzon opozitën për përçarje në Bërvenicë: Votuesit tanë mbështesin unitetin dhe kandidatin shqiptar

Përmes një reagimi sot, VLEN ka kritikuar opozitën shqiptare për gjuhën që po përdor në Bërvenicë, duke e cilësuar atë si përçarëse. Nga ky subjekt theksojnë se nuk do të përfshihen në pazare të errëta politike të BDI-së në dëm të banorëve të komunës.

Sipas VLEN-it, vullneti që banorët e Bërvenicës shprehën më 18 tetor respektohet prej tyre. Ata rikujtojnë se, sapo përfundoi votimi, kandidati i tyre Jakup Huseini dhe shtabi lokal e përgëzuan Arkin Jahijin për fitoren dhe i shprehën mbështetjen për raundin e dytë.

VLEN vlerëson se tashmë i takon Arkin Jahijit dhe koalicionit të tij të sigurojnë mobilizimin e votuesve për raundin e dytë të zgjedhjeve lokale. Ndërkohë, sipas këtij subjekti, mënyra se si po shprehet opozita gjatë këtyre ditëve nuk ndihmon bashkimin.

Në reagim thuhet se gjuha nxitëse dhe përçarëse, së bashku me sulmet kundër kandidatit të VLEN-it, pavarësisht qëndrimit të tij konstruktiv, synojnë të prodhojnë të kundërtën e unifikimit.

VLEN nënvizon se votuesit e tij janë orientuar drejt unitetit dhe mbështetjes së kandidatit shqiptar që në natën e zgjedhjeve. Duke përjashtuar pjesëmarrjen në lojëra të pista në kurriz të banorëve, ky subjekt paralajmëron se futja e Bërvenicës në pazare politike, siç thotë se ka vepruar BDI-ja në të kaluarën, do të përbënte tradhti ndaj votuesve të tyre dhe ndaj çdo qytetari të Bërvenicës.