Viti shkollor fillon nesër, rreth 14.500 nxënës të klasës së parë nisin rrugëtimin shkollor

Nesër hapen dyert e shkollave fillore dhe të mesme në Maqedoni, ndërsa për rreth 14.500 fëmijë të klasës së parë 1 shtatori shënon për herë të parë uljen në bankat shkollore. Ata do të përballen me një mjedis të ri, mësues dhe shokë të rinj klase.

Rënia e numrit të nxënësve pritet të reflektohet edhe në strukturën e organizimit të mësimit. Gjatë vitit shkollor 2026/2027 parashikohet të funksionojnë rreth 200 paralele më pak në arsimin fillor dhe 100 më pak në arsimin e mesëm.

Në të njëjtën kohë, është bërë e ditur se do të mbyllen 26 shkolla rurale, pasi në asnjërën prej tyre nuk është regjistruar nxënës i klasës së parë. Deri tani, në disa nga këto institucione mësimin e kanë ndjekur vetëm nga pesë deri në tetë nxënës.

Të dhënat përfundimtare për numrin e nxënësve të arsimit fillor dhe të mesëm që do të rikthehen nesër në mësim ende nuk janë publikuar. Shifrat më të fundit të plota të Entit Shtetëror të Statistikave tregojnë se në nisje të vitit shkollor 2025/2026, arsimi fillor i rregullt kishte 174.040 nxënës, ndërsa arsimi i mesëm 67.540, në total 241.580 nxënës.

Një vit më parë, në klasën e parë ishin regjistruar 17.921 nxënës. Krahasuar me këtë shifër dhe me rreth 14.500 nxënësit që pritet të fillojnë klasën e parë këtë vit, rënia është e konsiderueshme. Megjithatë, diferenca e saktë do të përcaktohet vetëm pasi të mbyllen regjistrimet plotësuese.

Ministria e Arsimit dhe Shkencës njofton se tekstet shkollore janë dërguar në shkolla dhe janë tashmë në dispozicion të nxënësve. Në përputhje me kalendarët e punës për shkollat fillore dhe të mesme publike, procesi mësimor nis më 1 shtator.

Me rastin e fillimit të vitit të ri shkollor, drejtuesit e automjeteve këshillohen të tregojnë vëmendje të veçantë pranë shkollave, kalimeve të këmbësorëve dhe stacioneve të autobusëve. Në këto zona pritet të ketë shumë më tepër fëmijë gjatë ditëve në vijim.