LSDM: Maqedonia po zbrazet nga nxënësit dhe të rinjtë, ndërsa qeveria sjell “punëtorë ekonomikë

LSDM-ja deklaron se viti 2026 përbën periudhën më të rëndë për arsimin në vend që prej shpalljes së pavarësisë.

Sipas kësaj partie, të dhënat e fillimit të vitit shkollor janë alarmante: 3,000 nxënës më pak në klasat e para, 148 shkolla pa nxënës, 433 klasa më pak dhe mbyllja e 26 shkollave rajonale. LSDM-ja vlerëson se një situatë kaq e zymtë në nisje të vitit shkollor nuk është parë më herët, duke e cilësuar atë si “rrënim të politikave kriminale të Mickoskit”.

“Maqedonia po mbetet pa nxënës të klasës së parë, institucionet arsimore po boshatisen dhe klasat po pakësohen. Bashkë me to, po humbasim edhe të ardhmen e vendit”, shprehen nga LSDM-ja.

Partia opozitare thotë se gjendja e vështirë ekonomike, emigrimi dhe pengimi i rrugës drejt Evropës po nxisin largimin e të rinjve dhe po dobësojnë fuqinë punëtore të Maqedonisë. Sipas saj, izolimi që po ndjek qeveria e Mickoskit po i shtyn të rinjtë të largohen nga vendi.