Toshkovski në forumin e UNODC-së: Lufta kundër trafikimit të njerëzve kërkon reagim të bashkërenduar dhe të vendosur

Ministri i Punëve të Brendshme, Pançe Toshkovski, mori pjesë sot në Takimin Rajonal të ekspertëve për forcimin e bashkëpunimit penal ndërkufitar dhe mbrojtjen e viktimave të huaja në rastet e trafikimit të njerëzve. Aktiviteti u organizua nga Zyra e Kombeve të Bashkuara për Drogë dhe Krim (UNODC).

Gjatë fjalës së tij, Toshkovski nënvizoi se përballimi i trafikimit të njerëzve, i cili përbën një nga format më të rënda të krimit të organizuar, kërkon bashkëpunim ndërkombëtar dhe koordinim të plotë ndërmjet institucioneve.

“Trafikimi i njerëzve është një fenomen global dhe i papranueshëm nga pikëpamja shoqërore. Ai nuk njeh kufij dhe nuk diskriminon sipas prejardhjes, përkatësisë apo bindjeve të viktimave. Për këtë arsye, edhe përgjigjja jonë duhet të jetë e vendosur, e organizuar, gjithëpërfshirëse dhe multidisiplinare”, deklaroi ministri.

Sipas tij, grupet kriminale nuk kufizohen vetëm te format e njohura të shfrytëzimit, por po krijojnë vazhdimisht metoda të reja dhe më të ndërlikuara për abuzimin me njerëzit.

Vëmendje të posaçme ministri i kushtoi shfrytëzimit seksual dhe atij në punë, ndërsa theksoi se shtetasit e huaj që largohen në kërkim të kushteve më të mira ekonomike janë veçanërisht të ekspozuar ndaj rrezikut për t’u kthyer në viktima të trafikimit.

Toshkovski tha se Ballkani Perëndimor mbetet njëkohësisht zonë origjine, tranziti dhe destinacioni për viktimat e trafikimit. Në Maqedoni, gjatë viteve të fundit, është evidentuar kryesisht trafikimi i brendshëm, edhe pse janë identifikuar edhe viktima të huaja.

Ndër grupet më të rrezikuara, ai veçoi fëmijët dhe personat që përballen me varfëri, diskriminim ose dhunë në familje. Për këtë arsye, institucionet duhet të monitorojnë në mënyrë të vazhdueshme zhvillimet e reja dhe të ndërhyjnë në kohë, theksoi ministri.

Duke folur për masat e ndërmarra në nivel kombëtar, Toshkovski rikujtoi se Maqedonia, që prej vitit 2001, ka vijuar të forcojë mekanizmat institucionalë kundër trafikimit të njerëzve. Këto përpjekje kanë përfshirë përafrimin e legjislacionit dhe praktikave me standardet ndërkombëtare dhe rekomandimet e organizatave përkatëse.

“Sistemi ynë mbështetet në pesë shtylla: parandalimin, ndjekjen penale, mbrojtjen, riintegrimin dhe kompensimin e viktimave. Në qendër të çdo mase që ndërmarrim është Njeriu — viktima, dinjiteti i së cilës duhet të rikthehet”, u shpreh Toshkovski.

Në përmbyllje, ministri vuri në dukje se trafikimi i njerëzve shpesh zhvillohet në fshehtësi dhe viktimat mbeten të padukshme për shoqërinë. Ai e cilësoi rritjen e ndërgjegjësimit publik, edukimin, identifikimin në kohë dhe raportimin si elemente thelbësore në luftën kundër këtij fenomeni.