Toshkovski: Lufta ndaj krimit të organizuar në burgje kërkon bashkëpunim dhe koordinim të përbashkët

Ministri i Punëve të Brendshme, Pançe Toshkovski, ishte pjesë e Konferencës Rajonale “Krimi i Organizuar në Burgje: Forcimi i Integritetit, Inteligjencës dhe Bashkëpunimit në Evropën Juglindore”, e zhvilluar nga Misioni i OSBE-së në Shkup. Në këtë aktivitet morën pjesë përfaqësues të institucioneve përgjegjëse, si dhe ekspertë nga vendet e rajonit.

Gjatë fjalës së tij, Toshkovski nënvizoi se veprimtaria e grupeve kriminale brenda institucioneve të vuajtjes së dënimit nuk mund të shihet vetëm si çështje e burgjeve. Sipas tij, edhe kur privohen nga liria, strukturat kriminale mund të vazhdojnë komunikimin, ndikimin dhe funksionimin e rrjeteve të tyre, duke cenuar integritetin institucional dhe efektivitetin e sistemit të drejtësisë penale në tërësi.

“Duhet t’i pranojmë pa rezerva dobësitë që ekzistojnë. Mbipopullimi, mënyra se si zbatohet paraburgimi, mungesa e zhvillimit të mjaftueshëm të alternativave, rreziku që individë të cenueshëm të rekrutohen dhe mundësia e ndikimit përmes korrupsionit krijojnë kushte që shfrytëzohen nga strukturat kriminale. Paralelisht, presioni, frikësimi dhe korrupsioni mund të dëmtojnë drejtpërdrejt integritetin dhe rezistencën e personelit të burgjeve. Këto janë sfida konkrete dhe nuk duhet t’i minimizojmë”, deklaroi Toshkovski.

Ministri e cilësoi integritetin si një bazë të rëndësishme për përballimin e këtij fenomeni. Ai përmendi nevojën për standarde të përcaktuara profesionale, drejtim të përgjegjshëm, sisteme funksionale për kontrollin dhe parandalimin e korrupsionit, si dhe mbështetje institucionale për oficerët, në mënyrë që ata të përballojnë presionet dhe ndikimet e ndryshme.

Një rëndësi të veçantë, sipas tij, ka edhe inteligjenca brenda institucioneve penale. Identifikimi në kohë i rreziqeve, theksoi Toshkovski, varet nga sigurimi i informacionit cilësor, analiza e saktë dhe komunikimi efikas ndërmjet shërbimeve të burgjeve, policisë, prokurorisë dhe institucioneve të tjera kompetente.

“Asnjë prej këtyre masave nuk mund të prodhojë rezultate të plota në mungesë të bashkëpunimit. Që nga parandalimi dhe hetimi, vijuar me aktakuzën e gjykimin dhe deri te zbatimi i sanksioneve, institucionet duhet ta trajtojnë krimin si një përgjegjësi të përbashkët. Vetëm përmes mekanizmave operativë të koordinuar, shkëmbimit efikas të informacionit, trajnimeve të përbashkëta dhe procedurave të qarta për ruajtjen e integritetit mund të krijojmë institucione të qëndrueshme, të afta të mbrojnë sigurinë dhe të drejtat e njeriut”, u shpreh Toshkovski.