Takimi Shasivari – Qehaja: Forcim i bashkërendimit në drejtësi dhe thellim i reformave mes dy vendeve

Jeton Shasivari, ministri i Drejtësisë, priti në një takim Florian Qehajën, ambasadorin e Kosovës në Maqedoninë e Veriut, ku në qendër të bisedës ishte thellimi i marrëdhënieve dypalëshe në sektorin e drejtësisë.

Bashkëbiseduesit u ndalën në tema kyçe si konsolidimi i shtetit ligjor, autonmia e sistemit gjyqësor dhe modernizimi digjital i shërbimeve të drejtësisë, çka përbën thelbin e nismave për rritjen e efektivitetit institucional.

Në fjalën e tij, ministri Shasivari nënvizoi se të dy shtetet kanë një aspiratë të përbashkët për një rajon të qëndrueshëm, demokratik dhe të ankoruar në Bashkimin Evropian.

“Si vende fqinje dhe partnere, Maqedonia e Veriut dhe Kosova synojnë të njëjtin rajon stabil, demokratik dhe të integruar në BE. Përvoja dhe praktikat më të mira që shkëmbejmë do të ndihmojnë në zbatimin më efektiv të reformave dhe fuqizimin e partneritetit tonë,” u shpreh ai.

Më tej, Shasivari theksoi se harmonizimi i ngushtë mes institucioneve të drejtësisë të të dy vendeve, së bashku me shkëmbimin e eksperiencave, do t’u japë shtysë transformimeve reformuese, do të forcojë rendin ligjor dhe do të çojë përpara përmbushjen e objektivave të përbashkëta në procesin e integrimit evropian.