Shasivari dhe ambasadori Qehaja diskutojnë forcimin e bashkëpunimit në drejtësi dhe reforma

Jeton Shasivari, ministër i Drejtësisë, është takuar me ambasadorin e Republikës së Kosovës në Maqedoninë e Veriut, Florian Qehaja, për të biseduar mbi zgjerimin e bashkëpunimit dypalësh në sektorin e drejtësisë.

Në qendër të diskutimeve ishin forcimi i sundimit të ligjit, garantimi i pavarësisë së gjyqësorit dhe digjitalizimi i sistemit të drejtësisë. Këto çështje u trajtuan në kuadër të reformave që synojnë ta bëjnë funksionimin institucional më efikas.

Shasivari nënvizoi se Maqedonia e Veriut dhe Kosova kanë një vizion të përbashkët për ndërtimin e një rajoni demokratik, të qëndrueshëm dhe të integruar në Bashkimin Evropian.

“Si vende fqinje dhe partnere, Maqedonia e Veriut dhe Kosova synojnë një rajon të qëndrueshëm, demokratik dhe të përfshirë në Bashkimin Evropian. Ndarja e përvojave dhe praktikave të suksesshme do të mundësojë zbatimin më efektiv të reformave, si dhe forcimin e mëtejshëm të bashkëpunimit ndërmjet nesh”, deklaroi Shasivari.

Sipas ministrit, lidhjet e ngushta mes institucioneve të drejtësisë në të dyja vendet, së bashku me shkëmbimin e përvojave, do të japin ndihmesë në përparimin e reformave, konsolidimin e sundimit të ligjit dhe realizimin e synimeve të përbashkëta gjatë rrugëtimit drejt integrimit evropian.