Studentët shqiptarë nga Maqedonia e Veriut solidarizohen me Kosovën: Kërkojnë drejtësi për ish-drejtuesit e UÇK-së

Studentët shqiptarë nga Maqedonia e Veriut i janë bashkuar thirrjeve për një proces të drejtë gjyqësor ndaj ish-krerëve të Ushtrisë Çlirimtare të Kosovës, në prag të shpalljes së vendimit përfundimtar nga Gjykata Speciale në Hagë, që pritet të bëhet më 16 shtator.

Besjan Rexhepi, përfaqësues i Unionit të Studentëve Shqiptarë në Maqedoninë e Veriut, ka shprehur mbështetjen e tij për studentët e Kosovës dhe ka kërkuar që procesi të zhvillohet në mënyrë të drejtë, transparente dhe të paanshme.

Sipas Rexhepit, vendimet e drejtësisë duhet të mbështeten vetëm në prova dhe fakte, pa ndërhyrje politike apo zbatim të standardeve të dyfishta.

“Në cilësinë e studentëve shqiptarë në Maqedoninë e Veriut, qëndrojmë në solidaritet me studentët e Kosovës dhe japim mbështetjen tonë të plotë për një proces gjyqësor të drejtë, transparent dhe të paanshëm. Jemi të bindur se drejtësia duhet të udhëhiqet vetëm nga faktet dhe provat, pa ndikime politike e pa standarde të dyfishta. Si brez i ri, kërkojmë drejtësi, barazi dhe respektimin e të drejtave themelore të çdo individi”, ka deklaruar Rexhepi.

Gjatë këtij procesi, Hashim Thaçi, Rexhep Selimi, Jakup Krasniqi dhe Kadri Veseli kanë mohuar akuzat për krime lufte dhe krime kundër njerëzimit, duke u deklaruar të pafajshëm. /Telegrafi