Sistemi “Qyteti i Sigurt” zgjerohet në Prilep dhe Manastir me mbi 40 pika radari

Projekti “Qyteti i Sigurt” pritet të shtrihet së shpejti edhe në territorin e Sektorit të Punëve të Brendshme në Manastir, ku do të përfshihet edhe qyteti i Prilepit.

Njoftimi u bë nga drejtori i Byrosë së Sigurisë Publike, Aleksandar Janev, gjatë vizitës së tij në Departamentin e Punëve të Brendshme në Prilep.

Janev bëri të ditur se aktualisht po përgatitet dokumentacioni i nevojshëm, ndërsa zbatimi i sistemit në këtë zonë parashikohet të nisë gjatë muajve të ardhshëm.

Në kuadër të projektit janë planifikuar më shumë se 40 pika në zonën e SPB Manastir, përfshirë edhe lokacione në Prilep.

Pajisjet dhe teknologjia moderne synojnë të sigurojnë kontroll më të efektshëm të trafikut dhe një reagim më të shpejtë nga shërbimet përgjegjëse.

Sipas Janevit, përdorimi i “Qytetit të Sigurt” shkon përtej mbikëqyrjes së trafikut. Sistemi mund të ndihmojë policinë në parandalimin e veprave, verifikimin e fakteve, mbledhjen e provave për procedura, si dhe në ruajtjen e rendit dhe qetësisë publike.

Ai tha se ulja e numrit të viktimave në aksidentet rrugore dhe rritja e kulturës së qytetarëve në trafik përbëjnë tregues të rëndësishëm për gjendjen e sigurisë rrugore.

Drejtori i Byrosë së Sigurisë Publike u bëri apel shoferëve, këmbësorëve dhe çiklistëve që t’u përmbahen në çdo kohë shenjave dhe rregullave të trafikut.