Sistemi “Qytet i Sigurt” nis funksionimin në Veles

Ministri i Punëve të Brendshme Pançe Toshkovski dhe kryeministri Hristijan Mickoski vizituan sot, gjatë qëndrimit të tyre në Veles, qendrën e rikonstruktuar të komandës së SPB Veles. Gjatë vizitës, ata u informuan për punën e qendrës dhe shënuan aktivizimin e sistemit “Qytet i Sigurt” në rajonin që mbulohet nga SPB Veles.

Sipas njoftimit të MPB-së, qendra e komandës është ngritur në hapësira që janë rikonstruktuar dhe rinovuar tërësisht. Këto ambiente më parë përdoreshin nga Ministria e Mbrojtjes, ndërsa kishin mbetur jashtë përdorimit për rreth 15 deri 20 vjet.

Me funksionalizimin e ambienteve të reja, SPB Veles disponon tashmë një qendër moderne prej së cilës zhvillohen aktivitetet e lidhura me sistemin “Qytet i Sigurt”.

Toshkovski bëri të ditur se vetëm gjatë 24 orëve të djeshme janë evidentuar rreth 124 gjoba, ndërsa deri në momentin e deklaratës së tij sot ishin regjistruar rreth 27 të tjera. Në total, brenda një dite e gjysmë, në territorin e SPB Veles janë shqiptuar rreth 150 gjoba. Kjo zonë përfshin Velesin, Kavadarin, Negotinën dhe Demir Kapinë.

Shumica e shkeljeve kanë të bëjnë me tejkalimin e shpejtësisë, ndërsa tre ose katër masa janë vendosur për kalim në semafor të kuq. Sipas ministrit, këto të dhëna tregojnë një përmirësim të dukshëm në respektimin e rregullave të qarkullimit rrugor nga qytetarët e Maqedonisë.

Ministri nënvizoi se sistemi “Qytet i Sigurt” nuk është krijuar për të ndëshkuar qytetarët apo për të rritur të hyrat në buxhet. Synimi kryesor, tha ai, është ndryshimi i sjelljes në trafik dhe shpëtimi i jetëve njerëzore.

“Dua të falënderoj, para së gjithash, qytetarët e Maqedonisë, sepse me zbatimin e një sistemi, objektivi kryesor i të cilit është shpëtimi i jetëve të njerëzve dhe jo mbushja e buxhetit, kemi dëshmuar se mund të sillemi vërtet në mënyrë evropiane. Pasojat pozitive të kësaj sjelljeje janë një numër shumë më i ulët viktimash, më pak aksidente trafiku dhe dukshëm më pak pasoja negative si rezultat i shkeljes së rregullave të komunikacionit”, deklaroi Toshkovski.