Shpërndarja e 50 mijë litrave ujë të pijshëm falas nis në Gostivar

Duke filluar nga dita e sotme, Qeveria e Maqedonisë së Veriut ka nisur furnizimin e qytetarëve të Gostivarit me 50.000 litra ujë të pijshëm në ditë, pa pagesë.

Masa synon të plotësojë nevojat elementare të banorëve gjatë periudhës sa janë aktive udhëzimet dhe rekomandimet e organeve përgjegjëse, bënë të ditur zyrtarët qeveritarë.

Për shpërndarjen e ujit do të kujdeset Shërbimi për Punë të Përgjithshme dhe të Përbashkëta pranë Qeverisë, përmes këtyre adresave:

– Ndërmarrja “Menaxhimi i Ujërave” – Gostivar, rruga JNA nr. 139

– Kopshti i fëmijëve “Prolet”, rruga Beliçica nr. 47

– Shkolla e Mesme Ekonomike – Gostivar, rruga Zhivko Brajkovski nr. 39

– Parku Kombëtar Pyjet – Dega “Shar” Gostivar, rruga Braqa Xhinoski nr. 165

– SHA EMV – Dega te garazhet, rruga Ilindenska

– Spitali i Përgjithshëm “Ferid Murad” – parkingu, rruga Çede Filipovski nr. 29

– Reparti Territorial i Zjarrfikësve – Gostivar, rruga Beliçica nr. 35

Ndërkohë, nga ekzekutivi theksuan se institucionet përkatëse po kryejnë verifikime të hollësishme, analiza laboratorike dhe hetime të thelluara për të zbardhur shkaqet e situatës së krijuar.

“Presim sqarim të plotë të ngjarjes dhe secili që rezulton fajtor do të përballet me pasojat ligjore. I ftojmë qytetarët të zbatojnë me përpikëri udhëzimet e autoriteteve dhe të informohen vetëm nga burimet zyrtare, në mënyrë që të kenë njoftime të sakta dhe në kohë reale”, thuhet në deklaratën qeveritare.

Prioritet kryesor i Qeverisë mbetet ruajtja e shëndetit publik, reagimi i menjëhershëm institucional dhe tejkalimi i plotë i kësaj faze, ndërsa do të vijojnë të ndërmerren të gjitha hapat e domosdoshëm për të mbështetur popullatën deri në rikthimin e normalitetit.