Epidemia në Gostivar, sot dalin analizat që pritet të përcaktojnë burimin

Gjendja shëndetësore në Gostivar mbetet shqetësuese, teksa vazhdon të shtohet numri i qytetarëve që kërkojnë trajtim mjekësor për probleme gastrointestinale. Për shkak të përkeqësimit të situatës, epidemiologët shpallën dje epidemi në qytet, përcjell INA.

Sot pritet të bëhen publike rezultatet e analizave të mostrave të siguruara nga ujësjellësi i Gostivarit. Përmes tyre do të përcaktohet nëse kontaminimi është shkaktuar nga uji i pijshëm apo rastet lidhen me një burim tjetër infeksioni.

Uji i ujësjellësit të Gostivarit vijon të jetë i ndaluar për konsum, në bazë të vendimit që Agjencia për Ushqim dhe Veterinari mori të premten.

Rezultatet laboratorike po priten edhe nga Prokuroria, e cila më pas do të vendosë për vijimin e procedurës. Me urdhër të prokurorit publik, zona e Vrutokut, ku janë përqendruar hetimet, vazhdon të mbahet nën sigurim.

Për t’u garantuar banorëve furnizimin me ujë të pijshëm gjatë kësaj situate, janë ndërmarrë disa iniciativa. Qeveria ka vendosur shpërndarjen e përditshme të 50 mijë shisheve me ujë, me synimin që të mbulohen nevojat bazë të qytetarëve deri në përfundimin e analizave dhe normalizimin e gjendjes.

Në Qeverinë e Maqedonisë së Veriut është paralajmëruar për sot, në ora 12:30, një konferencë për media. Ministri i Shëndetësisë Sasho Klekovski, drejtoresha e Institutit të Shëndetit Publik Marija Andonovska dhe drejtori i Shërbimit për Punë të Përgjithshme dhe të Përbashkëta Ivica Tomovski pritet të paraqesin para opinionit zhvillimet e fundit, rezultatet e analizave dhe masat e ndërmarra për tejkalimin e situatës./INA/