Shkupi siguron 3,300 kontejnerë të rinj për menaxhimin e mbetjeve

Qyteti i Shkupit ka nënshkruar kontratën për blerjen e 3,300 kontejnerëve të rinj, një investim që synon përmirësimin e menaxhimit të mbetjeve në kryeqytet. Sipas autoriteteve, pajisjet e reja do të ndihmojnë në mbajtjen e lagjeve më të pastra, në përshpejtimin e procesit të zbrazjes së kontejnerëve dhe në krijimin e kushteve më të mira të punës për stafin e NP “Higjiena Komunale”-Shkup.

Kreu i Qytetit të Shkupit, Orce Gjorgjievski, u shpreh se përmasat e këtij furnizimi dallojnë ndjeshëm nga investimet e mëparshme. Ai bëri të ditur se gjatë 12 viteve të fundit janë blerë gjithsej vetëm rreth 1,300 kontejnerë, sasi që nuk përmbushte më nevojat reale të qytetit dhe që kishte ndikuar në tejmbushjen e tyre, si edhe në përhapjen e mbeturinave përreth.

Gjorgjievski veçoi edhe uljen e kostos së furnizimit. Çmimi për një kontejner është përcaktuar në 9,600 denarë, ndërsa më parë çmimi kalonte 18,000 denarë për copë.

Sipas të dhënave të publikuara, kontejnerët janë siguruar me një çmim pothuajse dy herë më të ulët se në blerjet e mëparshme, edhe pse në nivel global është shënuar rritje e çmimeve të materialeve.

Furnizimi i ri vjen pas blerjes së fundit të automjeteve të reja komunale dhe është pjesë e një plani më të gjerë për modernizimin e NP “Higjiena Komunale”. Objektivi është ndërtimi i një sistemi më funksional dhe të qëndrueshëm për ruajtjen e pastërtisë në Shkup.