Shkupi nis shpërndarjen e ndihmës së njëhershme për të sëmurët me kancer

Brenda dy ditëve të ardhshme, 456 pacientëve onkologjikë që kanë kërkuar mbështetje të njëhershme financiare do t’u transferohen paratë në llogaritë transaksionale, njoftoi kryetari i Qytetit të Shkupit, Orce Gjorgjievski.

Në total, për këtë masë kanë parashtruar kërkesë 1.200 pacientë, ndërsa shqyrtimi i dokumenteve të aplikuesve të tjerë ende po vazhdon.

Gjorgjievski bëri të ditur se 456 përfituesit do t’i marrin mjetet nesër dhe gjatë ditës pasuese. Sipas tij, dokumentacioni i personave të mbetur po trajtohet me përgjegjësi dhe përkushtim maksimal, kurse pagesat për të gjithë aplikuesit pritet të përmbyllen gjatë javës së ardhshme.

Ai sqaroi se masa synon t’u ofrojë ndihmë të drejtpërdrejtë qytetarëve që po kalojnë një gjendje të rëndë shëndetësore.

Kreu i Shkupit deklaroi se institucionet kanë për detyrë t’u qëndrojnë pranë bashkëqytetarëve jo vetëm përmes fjalëve, por edhe duke treguar kujdes, humanitet dhe duke ofruar mbështetje konkrete.