Rrahja e dy të rinjve në Saraj, BDI kërkon nga MPB publikimin e raportit të plotë policor

Lidhja Demokratike e Integrimit ka dalë publikisht me një kërkesë drejtuar Ministrisë së Punëve të Brendshme, përmes së cilës kërkon transparencë të plotë rreth ndërhyrjes policore të datës 7 tetor në Saraj, gjatë së cilës dy të rinj, të moshës 21 dhe 23 vjeç, pretendohet se janë godetur në mënyrë brutale nga anëtarë të forcave të rendit.

Sipas partisë, publiku është përballur deri tash me versione që bien ndesh mes tyre për rrjedhën e ngjarjeve. Viktimat dëshmojnë se goditjet kanë vazhduar edhe pasi ata ishin lëshuar dhe kishin prangat në duar, ndërsa në hapësirën publike janë hedhur akuza se të rinjtë u kanë bërë rezistencë punonjësve të policisë dhe se i kanë marrë armën një oficeri.

BDI kërkon bërjen të aksesueshme për opinionin e raportit fillestar të patrullës, procesverbaleve si dhe akteve përkatëse që lidhen me çështjen, me kusht që të mbrohen të dhënat personale dhe të mos dëmtohet integriteti i hetimit.

Nëpërmjet një pyetorie, nga partia kërkohet të sqarohet se kush ka hartuar raportin, çfarë kanë thënë policët që morën pjesë në intervenim dhe në çfarë mase versioni i tyre përputhet me pamjet që qytetarët i kanë parë tashmë. Këto, sipas BDI-së, janë çështje që presin përgjigje zyrtare.

Theksohet gjithashtu se në qoftë se ka pasur shkelje të autorizimeve policore, përgjegjësia duhet të caktohet për secilin nga punonjësit e përfshirë, pa asnjë përjashtim. Sipas partisë, qytetarët meritojnë të mësojnë të vërtetën, ndërsa policia detyrohet të japë llogari për mënyrën si e ka përdorur forcën.

Mesazhi i BDI-së ishte i prerë: raporti duhet të dalë në dritë, përgjegjësia duhet mbajtur deri në fund dhe asnjë uniformë nuk garanton mbrojtje para ligjit. /Telegrafi/