Ramiz Merko dënohet me 5.000 euro gjobë për pllakën përkujtimore në hyrje të Komunës së Strugës

Gjykata Themelore e Strugës e ka shpallur përgjegjës ish-kryetarin e Komunës së Strugës, Ramiz Merko, duke e dënuar me 5.000 euro gjobë për vendosjen e paligjshme të një pllake përkujtimore në hyrje të ndërtesës së komunës.

Sipas aktakuzës, vendosja e pllakës ka nxitur urrejtje dhe ndarje etnike mes banorëve të Strugës. Për këtë arsye, ndaj Merkos është ngritur përgjegjësi për një vepër penale të përcaktuar në nenin 27 të Ligjit për Monumentet Memoriale dhe Memorialet.

Gjykatësi i shkallës së parë, Jordan Jovanov, sqaroi në seancën e sotme se gjykata e konsideron të akuzuarin përgjegjës për veprën për të cilën është ngarkuar. Ai bëri të ditur se rasti është trajtuar përmes dy procedurave, ndërsa njëra prej tyre kishte natyrë kundërvajtëse dhe lidhej me moszbatimin e procedurës për ngritjen e memorialit. Për këtë shkelje ishte nxjerrë urdhër për pagesë të gjobës, masë që zbatohet për çdo memorial, edhe kur ai nuk nxit urrejtje fetare apo etnike.

Jovanov tha se procedura penale në këtë rast mbështetet kryesisht në qëndrimin e Komisionit për Parandalimin dhe Mbrojtjen nga Diskriminimi. Mbrojtja e kishte kundërshtuar këtë qëndrim përmes një kallëzimi penal në Gjykatën Administrative, por kërkesa ishte refuzuar me vendim, i cili më pas ishte konfirmuar edhe nga Gjykata e Lartë Administrative. Sipas tij, kjo nënkupton se mendimi mbetet i vlefshëm dhe në fuqi. Ai është hartuar mbi bazën e vlerësimit të ekspertëve të Institutit të Historisë Kombëtare, të cilëve u ishte kërkuar të përcaktonin nëse simbolika e pllakës mund të shkaktonte ose nxiste urrejtje fetare apo etnike.

Në deklaratën përfundimtare para gjykatës, Merko mohoi të kishte lidhje me vendosjen e pllakës në objektin e Komunës së Strugës. Ai tha se Shoqata e Pensionistëve Shqiptarë kishte dëshmuar për këtë çështje dhe kishte pranuar se e kishte vendosur pllakën në ditën kur, çdo vit, organizonte një akademi kushtuar alfabetit shqip.

Merko shtoi se për ekzistencën e pllakës kishte marrë vesh nga inspektorët shtetërorë të kulturës. Sipas tij, ata i kishin shqiptuar gjobë Komunës dhe kishin bërë të ditur se, nëse ajo paguhej, pensionistët do të liroheshin nga përgjegjësia e Komunës dhe rasti do të konsiderohej i mbyllur./Telegrafi/