Qeveria gati për masa të reja për karburantet, Mickoski përmend uljen e TVSH-së si një alternativë

Pas rritjes së pandërprerë të çmimeve të karburanteve, kryeministri Hristijan Mickoski ka paralajmëruar se Qeveria do të vijë në veprim me një paketë të re masash.

Ai bëri të ditur se aktualisht po shqyrtohet nëse ndërhyrjet do të kenë karakter të përgjithshëm apo do të orientohen drejt grupeve të caktuara, ngjashëm me praktikat e mëparshme.

Një nga skenarët në tavolinë është edhe reduktimi i përkohshëm i Tatimit mbi Vlerën e Shtuar për lëndët djegëse. Duke iu referuar shpalljes së gjendjes së krizës në të gjithë vendin, Mickoski theksoi se ekzekutivi zotëron instrumentet e nevojshme ligjore për të ndërmarrë një veprim të tillë.

Duke komentuar luhatjet në bursa, ai vuri në dukje se Qeveria tashmë ka ndërhyrë duke ulur një pjesë të akcizave për benzinën dhe naftën. “Për fat të keq, kushtet në tregjet botërore janë duke u përkeqësuar. Sërish po i qasemi pragut psikologjik prej 100 dollarësh për fuçi, teksa tensionet ushtarake në rajonin e Gjirit Persik po shtohen,” u shpreh Mickoski.

Ai ritheksoi se për Qeverinë, mbrojtja e mirëqenies së qytetarëve mbetet objektivi kryesor, teksa ekspertët po peshojnë formën më efikase të ndihmës.

Lidhur me mundësinë konkrete të uljes së TVSH-së, Mickoski e konfirmoi si një alternativë, ndonëse jo më e parapëlqyerin, për shkak të pasojave të drejtpërdrejta në arkën e shtetit. “Edhe ky është një opsion. Ndonëse është ndoshta alternativa më pak e dëshiruar nga ne, për shkak të efektit negativ që ka mbi të ardhurat buxhetore, për ne mbetet prioritet standardi jetësor i popullsisë. Si Qeveri, synojmë t’i dalim në krah popullit sa herë që lind nevoja,” përfundoi ai.