Prokuroria kërkon paraburgosjen e 19-vjeçarit të dyshuar për plagosjen me thikë të një të mituri

Prokuroria Themelore Publike në Shkup ka nisur procedurë hetimore ndaj një 19-vjeçari, i cili dyshohet për veprën penale “Dhunë”.

Sipas organit të akuzës, i dyshuari, së bashku me vëllain e tij të mitur, i cili nuk ka arritur moshën e përgjegjësisë penale, kanë ushtruar dhunë ndaj një fëmije dhe një të rrituri, duke u shkaktuar atyre lëndime të rënda me thikë. Një fëmijë tjetër ka pësuar lëndime të lehta. Ngjarja, sipas Prokurorisë, ka krijuar pasiguri, kërcënim, frikë dhe ankth te qytetarët dhe personat që ndodheshin aty.

Për 19-vjeçarin, prokurori publik i ka kërkuar gjyqtarit të procedurës paraprake caktimin e masës së paraburgimit.

Ministri i Punëve të Brendshme, Pançe Toshkovski, bëri të ditur se i mituri i plagosur ndodhet në gjendje shumë të rëndë dhe po lufton për jetën.

“Një person aktualisht është në gjendje shumë të rëndë shëndetësore dhe po lufton për jetën. Bëhet fjalë për një të mitur, ndërsa sipas informacioneve fillestare të marra nga shërbimet e Ministrisë, edhe personi që ka kryer veprën penale është i mitur. Fëmija me lëndime të rënda trupore dhe fëmija që i ka shkaktuar ato janë të së njëjtës gjeneratë, të lindur në vitin 2012”, deklaroi Toshkovski.

Komuna e Çairit ka reaguar përmes një njoftimi, ku shpreh keqardhje të thellë për rastin dhe uron shërim sa më të shpejtë për të miturin e lënduar rëndë.

“Në lidhje me informacionet e publikuara në media, sqarojmë se ngjarja në fjalë nuk ka ndodhur në territorin e Komunës së Çairit. Hetimi dhe përcaktimi i plotë i rrethanave të rastit janë në kompetencë të institucioneve përkatëse”.

Komuna u ka bërë thirrje mediave që, për shkak të ndjeshmërisë së ngjarjes dhe faktit se të përfshirë janë të mitur, të raportojnë me kujdes dhe të verifikojnë saktë të dhënat, përfshirë vendndodhjen e incidentit, në mënyrë që të mos krijohet një perceptim i pasaktë në opinion./Telegrafi/